Shillong, Jymmang 05
Ka skul Sunrise Adventist Secondary School Lumperien, Khyndewso Ribhoi District, ha ryngkat ka jingïa treilang bad ka Hill Farmers Union, ka seng jong ki nongrep, ha ka sngi Ba-ar jong ka taïew ka la pynlong da ka Prorkam ‘Agriculture in a Classroom’ Lane ‘Ka rep ka riang ha ki kamra klass’.
Ka Kongsan (Chief Guest) ha kane ka sngi ka dei ka Dr Remika Talang, BDO ka Bhoirymbong Block, ha ka jingdon lang u General Secretary, Hill Farmers Union Central Body, u Bah Allfondbirth Kharsyntiew, u General Secretary Ribhoi District, Bah Pynshai Masharing, u President Raid Iapngap Circle, u Elbert Roni Ramde, Head Mistress jong ka Skul, Mrs Vicky Pale, ki nonghikai, ki khynnah skul bad ki kmie ki kpa jong ki khynnah skul.
Ka Jingthmu jong ka Skul ban pynlong ïa katei ka prokram, ka long ban pynrung ha ki jingmut jingpyrkhat jong ki khynnah skul, ha kaba ïadei bad ka jingkordor jong ka rep ka riang, ban pynkynmaw nangno ka bam ka poi ha ka pliang ja jong ngi, khlem u nongrep.
Ka jingpynlong katei ka prokram ka long ruh halor ka jinglong ba kongsan ban rep ïa ki jingbam khlem dawai (ka rep Organic) bad ban pynkynmaw ïa ki khynnah skul ban don ka jingieit ïa ka Mei mariang bad ba dei ban sumar sukher ïa ka.
U Bah Allfondbirth Kharsyntiew haba ai jingkren ha katei ka sngi u ong, ba kum ka seng ka don ka thong ba kan pynkhlaiñ ïa ka pule puthi bad sdang na ki jaka khappud , ha ki shnong khapud, ki don ïa ki khun kiba nang ba stad ka shnong bad ka ri ka shngaiñ.
U la kyntu ruh ïa ki khynnah skul ban burom ïa ki kmie ki kpa, kiba dei ki nongrep bad dei ruh ban long kiba don descipline.
Ka Dr Remiki Talang haba kren kum ka Kongsan ka la ïaroh ïa katei ka skul, ba ki la shim ïa kane ka sienjam ban pynlong ïa kane ka prokram, wat hapdeng shibun ki jingkylla haba wan ka roi ka par bapher bapher.
Kumta ka la ai khublei ruh ïa ka Hill Farmers Union, ba dei da ka jingïohi jngai jong ki nongïalam, ba ki lah ban ïatreilang bad ki skul ban pynkynmaw ïa ka jingkongsan jong u nongrep .
Ka la kyntu ruh ïa ki khynnah skul, “Ngim dei ban klet ïa u nongrep, wat lada phi la long ki Doktor, ki engineer ne ha kano kano ka kyrdan, namar khlem u nongrep ngin nym ïoh bam.
Ha katei ka sngi ki khynnah skul ki la ïoh ban thung ha kper jong ka skul ïa ki dieng bapher bapher, ki diengsoh, ki jhur ba bun jait bad ki symbai jur kiba ha rukom, kiba la thung katkum ka aïom.
