Shillong, Jymmang 05
U Deputy Commissioner ka East Garo Hills, u la pynmih ïa ka jingbthah paidbah ba pynlong kongsan ban pynrung kyrteng ïa baroh ki nongbylla bar jylla (migrant worker) ha ka District hapoh ka Meghalaya Identification and Registration (Safety & Security) Act, 2020, haba maham ban shah daiñ kuna bad shah set along ïa kiba pynkheiñ aiñ.
Ka jingbthah ka ong, ba kine ki sienjam kidei kiba la shim da ka jingthmu ban pynthikna ïa ka jingshngaiñ, ka jingpynneh ïa ka suk ka saiñ, bad ïada ïa ka hok jong ki nongbylla bad ki nongshong shnong.
“Ki migrant worker ki mut ïa kino-kino ki briew ki bym dei ki nongshong shnong ka Jylla, kiba ïoh bylla ha kano-kano ka jaka trei. Baroh kine ki nongbylla ki hap ban pynrung (register) bad ïoh ïa ka registration card kaba treikam” ong ka jingbthah.
La tynrong ïa ka jingbah khlieh ha ki nongaikam ba kin pynthikna ba ki nongbylla bar jylla ba ki ai kam, kin dei kiba la pynrung kyrteng ïalade lyngba ka online portal http://www.investmeghalaya.gov.in, da kaba aiti ïa ki kot ki sla kum ka Aadhaar, EPIC, lane PAN card ha ryngkat bad ka dur ruh kumjuh.
La ong ruh ba ïa ka jingpynrung kyrteng, lah ban leh offline ha ka ophis jong ka Tnad Labour lane ha ka Deputy Labour Commissioner, East Garo Hills.
