Shillong, Jymmang 06
Uwei u rangbah ba la kynnoh ba u pynïaid ka kam die kyiad beaiñ, u la thombor da ka wait ïa ki dkhot jong ka VDP haba ki la leit ban tohkit halor kane ka kam.
Katkum ka khubor na ki pulit la ong ba u Bah Chandra I Nongbri u la ai ka jingujor sha ki pulit ba ha ka 1 tarik mynta u bnai, ha ka por kumba 9.20 mynmiet, hadien ka jingïoh jingujor na ki nongshong shnong halor ka jingdon jong ka jingdie kyiad beaiñ, ki dkhot ka VDP ryngkat bad ki dkhot jong ka shnong Wahingsyiem Smit ha East Khasi Hills ki la leit sha ka ïing sah jong uwei u briew ba kyrteng u Aibor Manik Mawthoh ha kane ka shnong ban tohkit halor kane ka kam.
Hynrei la ong ba une u briew u la thombor pynban ïa ki dkhot jong ka VDP da ka wait. Ka jingtohkit jong ki pulit halor kane ka kam ka dang ïaid shakhmat.
