Shillong, Jymmang 06
U Babu Kular Khongjirem u ba long u nonghikai ka KJP Girls Higher Secondary School, Shillong u la pynpaw ïa ka jingsngewkhia haba ïadei ka jingtynrong kam ka Sorkar Jylla ha ki nonghikai ba kin dei ki nonglum ïa ka Khana Samari (Census) da kaba kdew ba kane kan ktah ïa ka pule puthi jong ki khynnah skul.
Haba ïakren sha ki nongthoh khubor ha ka sngi Balang u la ong ba ka Sorkar ka ju pyndonkam ïa ki nonghikai ba kin leit lum ïa ka Khana Samari naduh ki por ba kham mynshuwa, khamtam ha ki thaiñ nongkyndong, namar ba dei tang ki nonghikai kiba don ka jingnang jingstad, hynrei u la ong ka la dei ka por ba ka Sorkar kan pyrkhat thymmai noh da kumwei pat.
Haba ïadei ka jingai ‘Appointment Order’ ka ophis Municipal ïa ki nonghikai ba hap ban leit lum Khana Samari, u la pynpaw ïa ka jingbym sngewïahap ha kaba u la kdew ba ka Sorkar ka donkam shuwa ban ïakren sngewthuh jingmut bad ki bor pynïaid skul kumjuh ki nonghikai, la ki long la kloi ne em ban leit lum Khana Samari. Shuh-shuh u la ong ba ka jingshim ka Sorkar ïa ki nonghikai ka ktah bha ïa ki skul kumjuh ïa ki khynnah skul, namar ha ka por ba ki leit pyntbit bad ki leit sha ki thliew ïing ban lum ïa ka Khana Samari, yn ym don nonghikai ha ki saw kynroh jong ki kamra klas, ha kaba u la ai jingmut ïa ka Sorkar ba kan shim ïa ki Samla ba la don ka jingnang jingstad ba kin long ki nongleit lum ïa ka Khana Samari.
U la ai jingmut ruh ïa ka Sorkar ba kan pyndonkam ruh ïa ki Rangbah Shnong ha ka ban jied ïa kiba lah ban leit lum Khana Samari bad kane kam kham pynsuk ïa ka Sorkar bad ïa ka Shnong, ym ban shu pyndonkam tang ïa ki nonghikai skul.
U Babu Kular u la kyntu ïa ka Sorkar ba nangne shakhmat kan pyndonkam noh ïa ki khynnah samla kiba la don ka jingnang jingstad, ki bym pat don ka kam ka jam ba kan long ruh ka jingai jinghikai ïa ki ha kajuh ka por ruh ba kan long ka jingmyntoi ha ka ïohkam ïohjam khamtam ha kane ka pyrthei ba kyrduh kam.
