Shillong, Jymmang 06
Ka National People’s Party (NPP) Meghalaya ka lah ban mynjur noh ïa ka kyrteng u Dr. DRL Nonglait uba dei u President ka Khasi Authors Society (KAS) kum u kyrtong ban ïakhun ïa ka ilekshon MP shiteng samoi na Shillong constituency.
Kane ka dei hadien ba u Dr. DRL Nonglait u la jubab da ka jingthoh sha ka National People’s Party ba u pdiang ïa ka jingtyrwa ban long kum u kyrtong ban ïakhun ïa ka ilekshon MP shiteng samoi na Shillong Parliamentary constituency.
Katkum ka shithi ba la ïoh, u Dr. DRL Nonglait u la phah da ka jingthoh ha ka sngi Balang ka 6 tarik Jymmang 2026 sha u President/Working President ka NPP, Shillong da kaba pynpaw ka jingsngewkmen ïa ki nongïalam bad ki nongtrei ka NPP kiba la ibit ïa u ban tyrwa ïa u ban ïakhun ïa ka ilekshon MP Lok Sabha 2026.
U la kular ban kohnguh ban bud ryntih ïa ka nongrim, ka jingthmu bad ka rai lang jong ka seng bad ban trei shitom na ka bynta ka jingbha jingmiat bad jingroi jong ki paidbah, ka Jylla bad ka ri.
Kumta u la kyrpad ba ka NPP kan hap ban ai jingmut bad ïatreilang naduh ki nongïalam bad ki nongkyrshan.
Kumban shu pynkynmaw u Dr. DRL Nonglait haba u bat kum u President ka KAS u la ïoh shibun ka jingkyrshan na ki paidbah hadien ka jingïakhih haduh ba ka Sorkar Jylla ka la kohnguh ban ithuh noh ïa ka ktien Khasi bad Garo kum ka ktien Sorkar ha kaba u Lat ka Jylla u la dep ban mynjur.
Haba pyrshang ban ïakren bad ki katto katne ki nongïalam ka NPP ki la ïathuh ba ki don haduh saw ne san ngut kiba la tyrwa ïalade ban long kum ki kyrtong hynrei la sngewthuh ba lada u Dr. DRL Nonglait u la pdiang ïa kane ka jingtyrwa, ka NPP lashai ka sngi ka 7 tarik Jymmang 2026 haba kan shong ïa ka jingïalang kan shim ïa ka rai ban jied ïa u Dr. DRL Nonglait.
