Shillong, Jymmang 06
Ka Hynñiewtrep Youths’ Council (HYC) ka pynrem jur ïa ka jingkiew dor jong ka New Shillong Township (NST) Water Supply Project na ka T.321 klur tyngka sha ka T.770 klur tyngka hapoh kane ka Sorkar MDA.
“Kane ka jingkiewdor kaba jan kot sha ka T.450 klur tyngka ka pynpaw ïa ka jingpynsepei ïa ka pisa paidbah, ka jingbym don ka jingpynmang kaba biang bad jingbym don jingïatreilang hapdeng ki tnad Sorkar bapher-bapher” ong ka kyrwoh khubor u President ka HYC u Bah Roy Kupar Synrem.
U la ong ba ka long kaba ym lah pdiang ba ka projek kaba la sdang pynbit pynbiang ha u snem 2014 ha ka dor kaba long T.321 klur, katba ka kiew syndet sha ka T.770 klur, na ki daw kiba ka Sorkar hi ka phla ba ka dei namar ba ym shym pynkhreh ne bishar bniah shuwa ban sdang ka kam. Kine ki pynpaw ïa ka jingbym salia jong ka Sorkar ïa ka pisa u paidbah da kaba shu leh thurmur bad wanrah ka jingduhnong pat ïa ka pla tyngka jong ka Jylla baroh kawei.
Ka HYC ka la buh jingkylli, mano ban shim jingkitkhlieh halor kane ka jingkiew jong ka dor? Balei ym shym la lehbha ïa ki ‘Feasibility Studies’ bad jingpynkhreh shuwa ban mynjur ïa ka projek? Balei ka pla tyngka u paidbah kan shah ktah na ka jingbym lah treikam bad ka jingbym jingïohi jngai jong ka Sorkar?
Ha kum kane ka por ba ki paidbah ka Jylla Meghalaya ki ïakynduh jingeh kum ka jingbym donkam donjam, ki surok kiba sniew, ka jingduna um, ka jingbym biang ki jaka sumar bad ka jingbym don ki jingtei paidbah kiba kongsan, kane ka jingpynkiew ka dor projek ka pynmih ïa ki jingsngewkhia kiba jur la kane ka kam ka khuid ne em, don eiei ne em sha lyndet bad ïoh lehse la pyndonkam bakla ïa ka pisa paidbah.
Ka pisa paidbah kam dei ka nongkynti shimet jong kano-kano ka Sorkar lane kontraktor. Man la kawei pa kawei ka pisa kaba shah pynlutkai namar ka jingbym lah treikam lane ka jingthurmur jong ka Sorkar ka long ka jingñiew beiñ ïa u paidbah ka Jylla hi baroh kawei.
Ka HYC ka kyntu ba ka Sorkar ka dei ban sangeh ban shim sting ïa ka pisa paidbah bad ban pynthikna ïa ka jingkhuid suba ha ka rukom pynlut ïa ka pisa paidbah bad ka jingsynshar paidbah kaba don jingkitkhlieh.
