Shillong, Jymmang 06
Ki nongïalam jong ki seng saiñ pyrthei ki la ong ba kin sa khmih bniah ïa ka kaiphod jong ka ‘Expert Committee’ halor ka ‘State Reserva-tion Policy’ hashuwa ban shim ïa kano-kano ka rai.
Kane ka long hadien ka jingïalang jong baroh ki seng saiñ pyrthei ba la pynïaid da u Myntri Rangbah ka Jylla, u Conrad K. Sangma ha ka Sngi Balang.
U Secretary ka MPCC, u Bah Manuel Badwar u la ong ba la khot ïa kane ka jingïalang ban batai lyngkot sha ki seng halor ka jinglap jong ka ‘Panel’.
“Ïa ka jingïalang la khot da u Myntri Rangbah, uba shu kwah ban batai lyngkot ha ngi halor ka kaiphod jong ka ‘Expert Committee’ kaba la thaw halor ka ‘Reservation Policy’ bad ki jinglap jong ka, bad ka jingai jingmut ba la ai,” u la ong.
Haba batai shaphang ka jingïakynduh, u Bah Badwar u la ong, “Ka la long ka jingïalang kaba shai bha ha kaba na ka liang u Myntri Rangbah hi um shym la shim sting ïa ka bad ngi burom ïa kata.”
U la bynrap, “Ngi ngeit ba ka bhah ka la treikam bha ha kine ki 50 snem ba la dep, ym don kano-kano ka jingdonkam ban pynkhih ïa ka ksing ngap bad nga sngew ba ka jingmut ka long kaba shai bha bad kum ki nongshong shnong ba don ka jingkitkhlieh jong ka Jylla, ngi hap ban peit bniah ïa ka.”
Da kaba kdew ba ka Congress ka dang hap ban pule bniah ïa katei ka kaiphod, u la ong, “Ka ‘Expert Committee’ hi ka la wanrah ïa ka kaiphod kaba bniah bad watla ngim pat pule ïa ka kaiphod haduh mynta bad kum ka seng kaba don ka jingsngewkhia, ngam tharai ba ngi la ïashong namarba ka kaiphod ka long kaba jrong bha.”
“Ngin sa peit bniah ïa ka ha ka por ban wan bad lehse ngin don katto-katne ki mat jingkdew ban pynpaw bad lehse ngin ym don ruh, ka shong ha ka seng”, la bynrap u Bah Badwar.
Ka MLA ka TMC na Ampati, ka Miani D. Shira ruh ka la ong ba ka seng kan sa ïakren halor kane ka kaiphod hashuwa ban ai jingmut ne kren eiei halor jong ka.
“Kumta, ngi la ïoh ïa ka jingpynpaw na ka komiti bad ki jinglap jong ka komiti, kumta ngin sa ïakren ha ka kyrdan jong ka seng bad ïa mynta hi, ngim pat lah ban ong eiei, kumta shisien ba ngi la don ka jingïalang ha ka kyrdan jong ka seng, ngin sa mih shakhmat bad kren halor kane,” ka la ong.
