Shillong, Jymmang 06
Ka Liang Pyrshah – ka Voice of the People Party (VPP) kam shym la ïashim bynta ha ka ‘All-Party Meeting’ ne ka jingïalang jong baroh ki seng saiñ pyrthei kaba la khot da ka Sorkar Jylla ha ka Sngi Balang ban ïakren ïa ka kaiphod jong ka ‘Expert Committee’ halor ka ‘State Reserva-tion Policy’, wat haba baroh kiwei pat ki seng saiñ pyrthei ki la ïashim bynta bad ai ïa ki jingai jingmut jong ki ha kane ka jingïalang.
Ha ka shithi ba la thoh ha ka 1 tarik Jymmang sha u Bah L.K. Diengdoh, Deputy Secre -tary ka tnad Personnel & Administrative Reforms (B), u President ka VPP, Bah Ardent Miller Basaïawmoit u la pynpaw ïa ka jingbym lah jong ka seng ban ïadon bynta ha ka jingïalang ka ban long ha ka 6 tarik u Jymmang.
Haba kdew ïa ka shithi jong ka Sorkar kaba la thoh ha ka 30 tarik u Ïaïong, 2026, u Bah Ardent u la ong, “Nga sngewsih ban pynsngew ba ka por kam long kaba ïahap na ka bynta katei ka jingïalang ba la kdew.”
“Kumba ka long mynta, ngi dang bunkam bad ki mat kiba kongsan kiba ïadei bad ka Jylla bad ki paidbah jong ka, kiba donkam ïa ka jingpynleit jingmut kyrkieh na ka liang ka Sorkar. Haba ïadei bad kine ki jinglong-jingman, ngi shem ba ngim lah ban ïashim bynta ha ka jingïalang ba la tyrwa,” ong ka shithi.
Ka jingbym don jong ka VPP ha ka jingïalang ka long kaba kongsan namarba ka seng ka la byrngem ban ïakhih halor ka mat jong ka ‘Reservation Policy’ la bun ki khep, hynrei ka la jied ban ym buh ïa ki jingai jingmut jong ka hakhmat ka Sorkar ha ka jingïalang jong baroh ki seng saiñ pyrthei. Kiwei pat ki seng saiñ pyrthei – United Democratic Party (UDP), Bharatiya Janata Party (BJP), Trinamool Congress (TMC), National People’s Party (NPP), Khun Hynniewtrep National Awakening Movement (KHNAM) and Hill State People’s Democratic Party (HSPDP) ki la wan ban ïashim bynta ha kane ka jingïalang bad ki la ïashim bynta ruh ha ka jingïamir-jingmut halor ka kaiphod jong ka ‘Expert Committee’.
Ha kane ka jingïalang ba la pyniaid da u Myntri Rangbah ka Jylla, u Conrad K. Sangma, la khot ban pan jingmut na ki seng saiñ pyrthei halor ki jingai jingmut jong ka ‘Expert Committee’ haba ïadei bad ka ‘State Reservation Policy’.
