Shillong, Jymmang 18
Ki paidbah nongshong shnong ka Daistong hapoh ka jingïalam ka Jaiñtia Students’ Union (JSU) bad ka Jaiñtia National Council (JNC) ha ka 18 tarik u Jymmang 2026, ki la ïaid paidbah ban leit tur sha khyrdop Secretariat, ban pyrshah ïa ka projek tih mawshun ha Lum Syrman, kaba hap hapoh ka Elaka Nongkhlieh, East Jaiñtia Hills.
Ka jingmih ki paidbah ka long ruh haba ïadei bad ka jingpyrshah ïa ka jingpynsngew paidbah, kaba la buh ban pynlong ha ka 22 tarik u Jymmang 2026, ha kaba ïa dei bad ka jingthmu tih mawshun jong ka Shree Cement Limited, da kaba kynnoh ba ka don ka jingpynkheiñ ïa ka Meghalaya Land Transfer Act bad ki jingleh bymhok ha ka Environment Impact Assessment (EIA).
Ki paidbah nongshong, ba kynthup ïa ki longkmie ki long kpa, haryngkat ki dkhot ka JSU bad JNC, ki la pynpaw ïa ka jingsngewkhia halor ki jingeh jong ka mariang, ka jingkynnoh ba la pynbor ïa ki trai shnong bad ka jingïasyllok paidbah kham mynshuwa, ban ïaid shakhmat ïa kane ka projek tih mawshun.
Ha kane ka sngi ki nongshong shnong ryngkat ki dkhot sengbhalang, ki la pyrta jam ban pynrem ïa ka Sorkar Jylla, bad ban pyrta ruh da kaba ong ‘Shree Cement Limited go back’.
Ka jingïaid paidbah ka la sdang naduh madan Malki ter- ter sha Barik, Civil bad ka jingthmu ka long ban leit tur beit shakhmat Secretariat, hynrei haba poi ha IGP, Mawbynna, ki paidbah bad ki sengbhalang ki la shah khangnoh ha ki bor pulit ka EKH.
La sakhi ruh ba ki pulit ki la pynïeng khraiñ da ki nar hapdeng surok, ban khang pyrshah ïa ka jingthmu leit tur ki paidbah shakhmat Secretariat.
Ha ka por ba la poi ha katei ka jaka ba la shah khang ban leit tur sha Secretariat, ka la don ka jingïania hapdeng ki nongïalam sengbhalang bad ki Magistrate. La ïohi ruh ba hadien ka jingbym shah ban tur sha Secretariat, ki paidbah ki la shong kyllaiñ mungor hapdeng surok ha ryngkat ka rah ïa ki lama bad ki plakad pynrem ïa ka Sorkar Jylla.
Haba kren ha kane ka jingïakhih, u President ka JNC u Bah Sambormi Lyngdoh u la ong “Ngi la sdang ïa kane ka jingpyrshah naduh u snem ba la lah ha ka por ba pynlong ïa ka ‘public hearing’, ba ïadei bad ka karkhana Shree Cement”.
“Kaei kaba ngi shem ha ka EIA jong kane ka Shree Cement ka long, ba ki la pynkheiñ ïa ka Meghalaya Land Transfer Act bad ngi la dep thoh ïa ki jingujor sha ki tnad bapher-bapher jong ka Sorkar Jylla, hynrei haduh mynta ngim pat ïoh satia ïa kano-kano ka jingpynshai na kine ki tnad” ong u Bah Sambormi.
U Bah Sambormi u la kynnoh ruh, ba ha ka public hearing ba long mynshem bnai, ki briew na ka shnong Daistong kim shym la ïohlad ban leit ïashim bynta ha ka ‘public hearing’ bad ki sengbhalang ruh kumjuh, ki la shah khang, da kaba pynïeng da ki ‘gunda’ bad ki kali ‘dumper’ ha shiteng lynti.
U la ïathuh ba ka kompeni ka la pynkhreh ban pynlong biang ïa ka ‘public hearing’ ha ka 22 tarik u Jymmang na ka bynta ka jingtih mawshun ha ka jaka kaba heh palat ïa ka 217 hectare.
“Kaei kaba ngi shem ha ka EIA ka long kaba sammut bha, nga lah ban ong, namar shuwa ba kino-kino ki kompeni kin pynlong ïa ka ‘public hearing’ ki dei ban ïoh ïa ki kyndon ban pynlong na ka Sorkar Jylla” u la ong. “Hynrei kaei kaba jia ha kane ka EIA ka Shree Cement, ngi la shem da kaba shai kdar, ba ka kyndon ka dei kaba la ai jingmynjur da ka SEIAA bad SEAC jong ka Sorkar Gujarat. Kumta kane ka long kaba beaiñ” u la bynrap biang.
“Mynta, ngi la wan sha Shillong ban pynsawa ïa ka sur ka jingsngewkhia jong ngi namar ha East Jaiñtia, ban pynlong ïa ka ‘public hearing’, ngi tip ba ka Sorkar ka pyrshang ban pyndonkam da ki ‘mafia’ bad ki ‘gunda’ ban khang ïa ki paidbah, na ka jingïashim bynta” u la kynnoh.
Kumta ka JNC bad ka JSU, ka pyrshah jur ïa kine ki sienjam ba la shim da ka Sorkar.
Halor ka jingpan jingbit ïa ka jingïaid paidbah, u la ong “Ngi la pan ïa ka jingbit na ki bor District, hynrei ki la ai jingbit ïa ngi tang ha kane ka jaka, namar kane ka dang dei tang ka jingsdang jong ka jingïakhih jong ngi. Ngim kwah ban pyndonkam da ka bor. Ngi kwah ban ïakhih da kaba jai-jai bad ba burom ïa baroh ar liang, sha ki bor district bad ka tnad pulit. Ngi wan hangne ban pynsngew shai ïa ka sur jong ngi sha ka Sorkar”.
U la ong ba ïa ka sienjam ban sa bud, yn sa pynbna hadien ba la thaw ïa ka komiti.
U General Secretary ka JSU Neikee Mukhim u la ong “Ngi ïawan shane ban pyrshah ïa ka ‘public hearing’ bad ban dawa ïa ka Sorkar ban pynduh pyndam noh mardor ïa ka”.
