Shillong, Jymmang 18
Ka Bharatiya Janata Party (BJP) Meghalaya ka la jied ïa ka kyrteng jong ki saw ngut kiba kwah ban ïakhun ïa ka ilekshon MP shiteng samoi, hynrei ïa ka rai kaba khatduh la khmih lynti ban shim ha ka jingïalang jong ka party ka ban long ha ka 20 tarik u Jymmang.
Ïa kane la pyntip, da u nongïalam ka BJP u ba long ruh u MLA ka Pynthorumkhrah u Bah AL Hek ïa kaba u la ong, “Ngi lah dep ban ïakren halor ki saw ngut ki kyrteng na ka bynta ka ilekshon shiteng samoi jong ka Lok Sabha”.
U la ong ba ka party kan sa don ka jingïalang ha ka 20 tarik u Jymmang 2026 bad ha katei ka jingïalang, ka party kan sa rai ïa u kyrtong u ba biang na ka bynta kane ka ilekshon shiteng samoi.
U Bah Hek u la kyntait ban ïathuh ïa ka kyrteng jong kitei ki kyrtong, da kaba ong ba ka dei ka rukom treikam jong ka party. “Ngi don 4 ngut ki kyrtong kiba don ïa ka jingthrang ban ïakhun ïa ka ilekshon shiteng samoi jong ka MP Lok Sabha”.
Haba kylli, la ka kyrteng jong u Myntri Sorkar u Bah Sanbor Shullai bad u IPS ophisar barim ka Jylla u M Kharkrang ki dei ki kyrteng kiba thrang ban ïakhun ïa ka ilekshon, u Bah Hek u la jubab da kaba ong, “Ngan ym batai eiei ïa ki kyrteng, hynrei ki la don pat saw tylli ki kyrteng. Tad ynda haba ka party ka la ïakren. Ngam lah ban ïathuh eiei ïa phi namar ba kane ka dei ka kam shimet hapoh jong ka party kumba ka long ïa mynta. Shisien ba ngi lah dep ban jied bniah ïa u kyrtong. Ngin sa ai ïa ka jingpynbna”.
U la ong ba, baroh ki sengsaiñ pyrthei kin pynïeng ïa la ki kyrtong bad pynthikna ba ka BJP ruh kan sa pynïeng ïa la u jong u kyrtong ha kane ka ilekshon MP shiteng samoi.
Halor ka jingpynïeng kyrtong ka NPP bad ka VPP, u la ong “Ki don ïa la ka mat treikam. Man la ki sengsaiñ pyrthei ki don ïa la ki jong ki mat treikam. Ka BJP ruh ka dei kaba don ïa ka mat treikam kaba khlaiñ bha bad phin sa tip ynda la poi ka por, hadien ba ngi la pynbna ïa u kyrtong.”
Haba pynpaw ïa ka jingskhem jingmut ïa ka jinglong jingman ka party, u Bah Hek u la ong, ba ka party ka don jingkyrmen ban jop ïa ka ilekshon na Shillong Seat, ha kaba u la kam ba BJP ka la nang kiew ha ka jingïoh ïa ka jingkyrshan ki paidbah ha kylleng ki bynta jong ka Jylla.
“Ki briew na kylleng ki bynta jong ka Jylla ki la wan ban pynïasoh bad ka BJP. Wat ki MLA kiba mynta bad kiba rim ki la wan ban ïakynduh shimet ïa nga bad pynpaw ba ki kwah ban pynïasoh noh bad ka BJP” u la ong.
Haba kylli ban ai ïa ka kyrteng jong ki nongthaw aiñ, u Bah Hek u la kyntait ban ïathuh da kaba ong, ba ka don ka aiñ kaba tehlakam ïa ki nongthaw aiñ ban ryngkang diengkper. “Tad haduh ba kin da wan ban pynïasoh, kam long kaba bha ban jer ïa ka kyrteng jongno-jongno ruh” ula ong.
Haba kylli la ka kyrteng jong u Myntri Rangbah barim ka Jylla u Mukul Sangma ka don napdeng ka kyrteng jong kita kiba don jingthmu ban pynïasoh sha ka BJP, u Bah Hek ula ong, “Ngan ym jer kyrteng eiei, hynrei ngan ong pat ïa phi ba ki don bun bha. Ym tang napoh ka Rilum Khasi-Jaiñtia hynrei wat na Ri-lum Garo ruh, ki la wan ban ïakynduh ïa nga shimet, ba ki kwah ban rung noh sha ka BJP. Ngin pdiang sngewbha ïa ki tangba ha ka por kaba dei pat” u la ong.
