Shillong, Jymmang 18
Ka Voice of the People Party (VPP) East Jaiñtia Hills District, ha ka 18 tarik u Jymmang 2026, ka la shim ïa ka rai ban pynlong da ka jingïakhih shong kyllaiñ mungor hakhmat u motdur u Woh Kiang Nangbah uba don hapoh ka phyllaw u Deputy Commissioner ha katei ka District.
Ka jingshim rai ka VPP ban ïakhih da kaba shong kyllaiñ mungor, ka dei kum shi bynta ban pyrshah ïa ka jingthmu ka Sorkar Jylla ban pynlong ïa ka jingpynsngew paidbah ne ka ‘Public Hearing’ ha Lum Syrman, haba ïadei bad ka jingkhlong mawshun ka Shree Cement Limited, kaba don ha Shnong Nongrim, Elaka Nongklieh, East Jaiñtia Hills.
Haba pynbna ïa kane sha ki lad pathai khubor, u Bah Damewanhi L. Rymbai, President, u ong “Kane ka jingïakhih, yn sdang naduh ka por 10 baje mynstep haduh ka por 5 baje janmiet”.
U la pynkynmaw ruh, ba na ka liang u (L) Dr. Ricky AJ Syngkon, MP barim, u la dep ban aiti da ka shithi sha ka Sorkar Pdeng, ba dei ban pynsangeh shuwa ïa kane ka projek bad kumta na ka liang ka seng kan nang ïai buddien halor kane ka mat.
Nalor kata, u la ong ba ka VPP ka dawa ba dei ban pynduh noh ïa kane ka projek, nalor ban ailad ïa ki nongshong shnong ban tih dewïong, khlem da donkam ban don ïa ka jaka kumba la bthah, kata 100 hectar.
“Ngi ïohi ba ka jingwan katei ka projek kam shym la pynmyntoi ïa ki trai shnong hynrei ka pynmyntoi ïa ki nongkhaïi kiba nabar jylla, kiba wanrah ïa kine ki kompeni Cement bapher-bapher shapoh ka District,” la ong u Bah Damewanhi.
U la ong kane ka jingailad ka Sorkar wat hapdeng ka jingmih ka jingpyrshah na kiba bun ki paidbah, haba ïadei bad ka Shree Cement Limited, ngi ïohi ba ka Sorkar ka thom da ka bor bad leh da ka bor.
Shuh shuh u ong “Ngim kwah ba kane ka projek kan urlong, da ka jingailad ka Sorkar sha kine ki kompeni heh spah, ban leh ïohnong katba ki mon ban pynjot ïa ka mariang.
“Ka jingsngewsih jong ngi ki nongshong shnong ka District ka long, ba ïa une u marpoh khyndew (u dewïong), uba la long trai da ma ngi, ngim ïoh shuh ban trei kumba ju long, namar la teh la khum da ki aiñ bapher-bapher, da kaba ki kynnoh ba pynjot ïa ka mariang, hynrei nga buh jingkylli, ba hato ka kham ktah ka jingtih mawshun ne ka kham ktah ka jingtih dewïong? bad ha ka jinglap jong ngi ka long, ba ka jingtih mawshun ka pynjot shisha ïa ka mariang,” la bynrap u Bah Damewanhi.
