Shillong, Jymmang 18
U Myntri Rangbah ka Jylla, u Conrad K. Sangma ha ka Lah Sngi U Blei u la pynbna ban pynkynriah noh ïa ka Meghalaya Teacher Eligibility Test (MTET), kaba la buh hashuwa ban pynlong ha ka 29 tarik u Jymmang.
Kane ka rai ka wan kum ka jingjubab ïa ki jingkyrpad na ka kynhun ki nonghikai kiba ïakynduh jingeh namar ki kam kiba hap ban ïaid shakhmat ba ïadei bad ka ri.
Haba kren ha ka jingïalang paidbah ha Damas, North Garo Hills, u Myntri Rangbah ka Jylla, u la ïathuh ba dang shen ki nonghikai ki la pynsngew ha u ïa ki jingeh jong ki ha ka ban pynkhreh ïa ka eksamin. Bun mynta napdeng jong ki, la phiah hapdeng ki kamram ha ki kamra klas bad ki kam ba hap leh na ka bynta ka Khanasamari bad SIR ka ban sa wan.
“Ki nonghikai ki don ka jingsngewkhia bad ki don hapdeng ka jingbym tip kumno ban leh, haba kheiñ lang ïa ki kam ba bun jait ba la bynshet ha ki ha kajuh ka por,” ong u Conrad.
“Da kaba pyrkhat ïa ki jingsngewkhia jong ki, nga kwah ban pyntip ba ïa ka eksamin MTET la pynkynriah noh. Ki nonghikai kim donkam ban khuslai. Ngin sa khmih bniah ïa ka jinglong-jingman baroh kawei bad ngin sa pynbeit biang ïa ka tarik kaba ïahap bad ba biang ban pyntikna ba kin ïoh pahuh ka por ban pynkhreh,” u la ong.
Nalor kane ka jingpynbna, u Myntri Rangbah u la pyndonkam ïa ka rynsan ban pynsngew ïa ka jingïaid lynti kaba ïar jong ka tnad pule-puthi ka Meghalaya.
U la ai jingïaroh ruh ïa ki nonghikai jong ka Jylla na ka bynta ka jinglah ban ïaishah bad ka jingaiti jong ki sha ki khynnah jong ka Jylla, khamtam haba ki ïaid lyngba ïa ki jingeh ha ki jingpynïaid kam kum ki jingduna ha ka liang ka jingai jinghikai ba pyntbit ïa ka kam.
Katba u pynpaw ïa ki jingïarap ba khlaiñ jong ka Sorkar bad ka jingbei tyngka kaba heh ha kine ki snem ba la dep, kiba la pynbha shi kat dei ïa ki jingtei jong ki skul bad pynbun ruh ïa ka jingbun jong ki jaka pule, u Myntri Rangbah u la mynjur ba ki kyrdan kim pat poi sha ka thong kumba la thmu.
“Ha kaba ïadei bad ka jingbun, ngi don bun ki skul, hynrei ngi sahdien ha ka jingpule kaba paka,” la kynthoh u Conrad.
“Ka jingkyntiew ïa ka kyrdan kan shim por, hynrei ngi aiti pura ban pyntikna ba kan urlong. Hynrei, kane ka jingkylla kam lah ban shaniah tang ha ka Sorkar ne ki nonghikai. Ka donkam ïa ka jingïatreilang ba shit rhem hapdeng ki kmie ki kpa bad baroh ki nongshim bynta ban kyntiew ïa ki khynnah jong ngi,” u la ong.
