Shillong, Jymmang 18
U Myntri Rangbah ka Meghalaya bad jong ka Assam kila shimkhia bha ban ïakren ban pynbeit noh ïa ka jingeh kaba mih ha Lapangap, ong u Symbud Myntri Rangbah Bah Sniawbhalang Dhar ha ka sngi Nyngkong, hadien ka jingïalang bad ki shnong ka bym shym la poi sha ka jingshim rai.
“Baroh arngut ki Myntri Rangbah kila ïakren sani bha halor kane ka mat bad kila shimkhia bha,” ong u Bah Sniawbhalang haba ïakren bad ki nongthoh khubor, bad ban jur ruh ba ïa kane ka kam la pynïaid bad ïakren ha ka kyrdan ba halor eh.
Kane ka jingkren kala mih hadien ba ki nongmihkhmat na baroh artylli ki shnong kila ïakynduh ha ka jingïadonlang ki Deputy Commissioner bad Superintendent of Police na Meghalaya bad Assam.
“Kala don ka jingïalang hapdeng baroh ar ki shnong ha ka jingdonlang ki bor pynïaid district na baroh arliang,” ong u Bah Sniawbhalang. “Ka jingïalang ka la long kaba ïaid beit bad ïaid suk,” hynrei ha kajuh ka por u la pynthikna ba kam shym la don kano-kano ka jingshimrai.
“Ki dang don katto katne ki kam kiba dang sah,” u la ong. “Khatduh, ka rai ba kumno ban ïaid shakhmat, ngim pat lah ban rai bad ngin sa ïapeit ha kine ki arsngi lane lai sngi ban wan”.
Ka kam rep kam riang ha kane ka jaka ba ïakajia ka dang sahkut bad ym pat lah ban pynïaid shakhmat.
Haba kylli la ka rep ka riang kala sdang biang, u Bah Sniawbhalang u la ong, “Kat haduh mynta ka sngi, kam pat sdang satia”.
Ha kawei pat ka liang, u Symbud Myntri Rangbah u la pynshai ba ka jingïakajia ha Lapangap kam dei satia shibynta jong ka jingïakren pynbeit khappud.
“Halor ka kam Lapangap, kam dei ka jingïakajia pud, ka dei eh halor ka jakpoh,” u la ong.
Halor ka wat kaba ar jong ka jingïakren pynbeit pud, u Bah Sniawbhalang u la ong ba ka Meghalaya ka dang ap ïa ka Assam ba kan thung biang ïa ka Regional Committee.
“Halor ka mat khappud, kata ynda ka Assam ka la thung ïa ki Chairman jong ki regional committee ki jong ki, ngin sa ïakren bad ïasyllok ha ka rukom kaba dei,” u la ong.
