Shillong, Jymmang 18
Ka National People’s Party (NPP) ka la kyntait ïa ki jingkynthoh ba dang shen jong u nongïalam ka BJP, u Bernard Rimpu N. Marak halor ka jingai jamin ïa u MLA barim ka Phulbari, u Esmatur Mominin ha kaba ïadei bad ka jingkulmar ha Ri-lum Garo, da kaba pynpaw ba ka Sorkar kam don bynta eiei haba ïadei bad ki rai jong ka ïingbishar.
Ha ka kyrwoh ha ka Lah Sngi U Blei, u nongaiktien ka NPP Garo Hills, u Aldo A. Sangma, u la ong ba ka seng ka sngew donkam ban “buh ïa ki katto-katne ki jingshisha ha ka rukom kaba dei” hadien ka jingkynthoh jong u Marak.
“Ha ka synshar paidbah kaba la synshar da ka jingsynshar aiñ, ïa ki rai jong ka ïingbishar la shim laitluid da ki ïingbishar katkum ki nongrim jong ka aiñ bad ki jingshisha kiba don,” la ong u Sangma.
“Ka Sorkar kam don bynta eiei ban rai ïa ki jingmih na ki jingbishar ki ïingbishar, kynthup ïa ka jingai jamin,” u la ong.
Ka NPP ka la ban jur ba ki jingtohkit jong ka aiñ ki dang ïaid shakhmat.
“Ka jamin ka dei ka kyndon aiñ kaba lah ban ïoh katkum ka aiñ bad kam dei ka jingpyllait ne ban weng ïa ka jingshah kynnoh,” la ong ka kyrwoh.
“Ki jingtohkit halor kane ka kam ki dang ïaid shakhmat, bad ka rukom treikam jong ka aiñ kan sa shim la ka jong ka lynti,” u la ong.
Haba kyrpad ïa ki nongmihkhmat paidbah ban kiar na kum kine kiei-kiei, ka seng ka la kdew, “Baroh ki nongmihkhmat paidbah bad ki nongïalam saiñ pyrthei ki dei ban kiar bad don ka jingkitkhlieh haba kren eiei halor ki kam ba ïadei bad ka aiñ, khnang ban pynneh ïa ka jingshaniah jong ki paidbah ha ki shnat synshar paidbah bad ban lait na ka jingsngewthuh bakla hapdeng ki paidbah.”
Ka kyrwoh ka kdew ruh sha ka jingroi jong ka Meghalaya hapoh “ka jingsuk bad jingskhem.”
“Ka Sorkar Jylla bad ka Sorkar Pdeng, da kaba ïatreilang, ki la bteng ban pynleit jingmut ha ka roi ka par, ki jingtei, ka bha ka miat, bad ka jingkiew ha ka ïoh ka kot jong baroh ki bynta ka imlang-sahlang,” ong u Sangma.
Katba ka Jylla “ka dang ïaid shakhmat ha ki liang bapher-bapher,” ka NPP ka la kyntu ïa kiba ïaleh pyrshah ha ka saiñ pyrthei ban kiar na ki jingkren kiba ïalam sha ka jingïapait ïapra.
“Ka NPP ka kyrpad sha baroh ki nongïashim bynta ha ka saiñ hima sima ban pynneh ïa ka jingïakren synshar paidbah kaba lait na kine kiei-kiei baroh bad ban ïatreilang na ka bynta ka jingmyntoi kaba ïar jong ka Jylla bad ki paidbah jong ka,” ka la ong.
Ka la bynrap ba ka seng “ka ïaineh ban pynneh ïa ka jingsuk, ka jingïatylli ha ka imlang-sahlang, ki nongrim ka riti-synshar, bad ka roi ka par kaba kynthup lang na ka bynta uwei-pa-uwei u nongshong shnong ka Meghalaya.”
