Shillong, Jymmang 19
U President ka UDP Mawkyrwat Circle, South West Khasi Hills District u Bah S Nongsiej u la ong ba u Bah Renikton Lyngdoh uba dei u MLA ka UDP ka Mawkyrwat Constituency ba mynta u khlem nud ban khot ïa u ban leit rung sha ka NPP namar u tip ba u dei uba skhem ha ka UDP.
U Bah Nongsiej u la ong ba kito ki nongkitkam bad ki nongkyrshan kiba dei na ka UDP ki dei ki nongkyrshan u Bah Renikton kiba la leit rung sha ka NPP katba ki nongkitkam bad nongkyrshan baskhem ka UDP kin nym pat khih haduh mynta.
Haba kylli lano yn pynthymmai ïa ki kam ba dang lait, u la ong ba ka UDP kam pat kyrkieh ban jied thymmai namar ki dang ap ïa kito kiba dang leit rung sha ka NPP namar ïoh kin wanphai biang.
Haba kylli biang kumno ka UDP kan leh ïa u Bah Renikton haba u la phah ïa ki nongkyrshan katba ïalade u dang don ha ka UDP, u Bah S Nongsiej u la pynpaw ba um lah ban ong eiei namar haduh mynta u dang kam ba u dang don ha ka UDP.
U la pyntip ba ki nongkitkam kiba dang don ha ka UDP ki long u Vice-President Bah Jeslanroy Nongsiej, Organising Secretary Bah Fast Ramsiej bad Bah Anbil Lyngdoh uba dei u Adviser.
U la ong biang ba lada ka UDP kan pynïeng ïa u kyrtong ha kane ka ilekshon MP shiteng samoi, kin sa pyrkhat ban pynthymmai ïa ki nongkitkam.
Ha kajuh ka por u la ong ba lada ki nongkitkam UDP ki leit rung sha ka NPP namar ki kwah ïa ka kam pynroi, kaba sheptieng ïoh ba wat ïa kaba la ïoh kin sa duh.
