Shillong, Jymmang 19
Ka Sorkar MDA kala kyntait ïa ka jingkynnoh ba ka tnad Public Health Engineering (PHE) kala pynkheiñ ïa ki kyndon ha ka jingai ïa ka projek kaba T.1,900 klur ïa ka kynhun kaba nabar ka Jylla Meghalaya, ha kaba u Myntri Sorkar bad u Nongaiktien ka Sorkar Bah Wailadmiki Shylla u la pynpaw ba ka jingkhot ïa ka Tender ka long kaba khuid ba suba bad kaba la ïaid katkum ka jingbuh ïa ki kyndon.
Haba kren halor kine ki jingkynnoh jong ka jingdon ka jingshah liang, u Bah Wailad u la ong, ba man la ki jingbhah ïa ka kam hapoh jong ki tnad ki dei kiba la ïaid lyngba ka rukom treikam jong ka jingkhot ïa ka Tender.
“Na ka bynta kino kino ki jingthep Tender, ka jingaiti ïa ka kam, kila don katto katne ki thup kyndon bad ki jingdonkam. Phi hap ban don ïa ki katto katne ki jingtbit bad jinglah,” u la ong bad ban jur ba ka rukom jied kam dei kaba leh ha ka lynti kaba bakla.
“Ka Sorkar kala ïaid katkum baroh ki rukom treikam ha kaba ïadei bad katei ka jingtei. Baroh ki jingdonkam ki dei kiba la lah ban pyndep,” ong u Bah Wailad ha ka sngi Ba-ar.
“Kam dei kumba ngi jied ïa kat kaba ngi mon. Ki don ki kyndon kiba la buh, ki rukom pynïaid kam kaba ngi hap ban bud ryntih,” u la ong bad bynrap ba ka jingthep tender kam dei kaba la khang satia ïa kano-kano ka karkhana.
“Lada uno uno u briew u ïoh ïa ka kam, ka dei namar ba ngi la bud ryntih ïa ki kyndon bad ïa ka rukom pynïaid ïa ki kam. Ka long kaba plie ïa baroh kiba kwah ban wan ban ïashimbynta lang,” ong u Myntri.
Shuh shuh u la ong, ki kyndon kim dei satia kiba la pynwandur ban ai jingmyntoi ïa uno uno u nongthep tender. “Kam mut ba ngi la thaw ïa ki kyndon ba tang utei u briew un wan ban ïashimbynta,” la ong u Bah Wailad.
Kane ka jingpynshai kala mih ka dei hadien ba ki seng kiba don ha ka Liang Pyrshah kila buh jingkylli halor ka rukom ïoh ïa bun tylli ki projek jong ka Jal Jeevan Mission kaba kot T.1,900 klur ïa ka kompeni kaba nabar ka Jylla.
