Shillong, Jymmang 20
Ka Ministry of Education kala khot aplikeshon na ka bynta ka kam Vice-Chancellor ka North-Eastern Hill University (NEHU), bad ka lad ban aplai online ha ka SAMARTH portal kan sdang naduh ka 20 tarik Jymmang, 2026.
Ka jingpynbna bala pynmih da ka Department of Higher Education kala ong ba ka kam Vice-Chancellor, “Kum u nongïalam ha ka pule puthi bad u nongpynïaid kam”, la khmih lynti ba un dei “u briew uba don ïa ka jingtbit ba hakhlieh duh, uba trei hok, uba bha bad uba aiti lut na ka bynta ka jaka pule”.
Katkum ka jingpynbna lait kam, ki nongaplai ki dei ban long “ki academician kiba la paw, bad kiba la don ka jingshemphang ba ym duna ïa ka 10 snem kum ki professor ha ka University lane ka jingshemphang ba 10 snem ha ki jingwad bniah kaba paw/ lane ka academic administrative organization ryngkat ki sakhi ka jinglong nongïalam ha ka pule puthi”.
Ka Ministry kala bynrap ba ki kyrtong ki dei ban long kata “kham kwah ïa ki bym pat tam ïa ka 65 snem ka rta kat haduh ka sngi ba kut jong ka jingpdiang ïa ki aplikeshon jong kane ka jingpynbna laitkam”.
Haba phai sha ka tulop bad ki kyndon treikam, ka Ministry kala ong ba kane ka kam ka ïoh ïa ka jingsiew ba T.2,10,000 ha ka shibnai ryngkat bad ki special allowance ba T.11,250 bad kiwei kiwei ki allowance ba ju ïoh”.
“Ki kyndon jong ka jingshakri kan long kito kiba la buh hapoh ka Act, Statutes bad Ordinance jong ka University,” ong ka jingpynbna.
Ka Ministry ka ong ba ïa ka jingthungkam yn leh na ka thup jong ki kyrtong bala phah da ka committee kaba la thaw hapoh ki kyndon jong ka Act ka University.
