Shillong, Jymmang 20
Ka Sorkar Meghalaya ha ka sngi Balang kala ong ba ka dang ap ïa ka jingmynjur na ka Karbi Anglong Autonomous Council (KAAC) ban ïateh da ka kular ban nym pynthut ka kam rep kam riang ha Lapangap bad ki shnong ba marjan, kaba la sakhi ïa ka jingkhie thymmai ka jingïakynad halor ka hok longtrai ïa ka jaka rep.
U Symbud Myntri Rangbah ka Jylla ba khmih ruh ïa ka tnad kam Pohïing Bah Prestone Tynsong u la ong ba ki heh ophisar ka Jylla kila leit sha katei ka thaiñ ha ka sngi Balang kum shibynta na ka jingpyrshang ban wanrah pat ïa ka jingsuk, haba bynrap ba ki nongrep ka Lapangap kila rep ha kane ka jaka da ki pateng la pateng.
U ïathuh ba u Myntri Rangbah Conrad K Sangma u la dep ruh ban ïakren bad ka Sorkar Assam lem bad ki dkhot ka KAAC halor kane ka kam.
Katkum ka jingïasngewthuh jingmut bala ïamynjurlang, baroh arliang kila mynjur ban shah ïa ka jingrep kba ha ki jaka ba don jingïakajia. Hynrei, ka Meghalaya kala pyrshah ban thung ïa ki dieng ne kino kino ki jingthung kiba neh shirta halor ka nongrim ba kane ka lah ban lam sha ka jingkam trai pat ïa kane ka jaka hadien habud ha ka jingïapynbeit pud.
U Bah Prestone u la ong ruh ba baroh artylli ki Sorkar kila mynjur ba ïa kane ka kam yn sa pynbeit da ka jingïakren hapdeng ki nongshong shnong bad ki Khlieh Nongsynshar, ha ka jaka jong ka jingtuklar da ki pulit. Ki bor pahara kin dang ïai bteng ban don ha ka thaiñ tad haduh ban da wanphai biang ka jingsuk.
Hynrei, ka jingeh kala sahkut naba ka Jylla ka dang ap ïa ka jingpynthikna jong ka KAAC.
Shuwa kane, u Nongaiktien ka Sorkar Bah Wailadmiki Shylla u la kynnoh ba ka KAAC kala kynran dien na ka nongrim ba ka ïeng ha ka jingïakren bad kane kala buh ha ka jingeh ban pynbeit ïa ka jingïakynad.
