Jowai, Jymmang 20
Ka ïingkashari District and Sessions, West Jaiñtia Hills, kala rai pynrem ïa u pulit barim ka Jylla u Sub-Inspector Glithstone Ch. Marak da kaba set phatok 2 snem ryngkat bad ka jingshah daiñ kuna kaba T.2,000 halor ka jingïap uwei u samla ba 29 snem ka rta ha along.
Katkum ka kyrwoh kaba la phah da u Superintendent of Police ka West Jaiñtia Hills, u la pyntip ba katei ka jingjia kala jia ha ka 16 tarik u Naiwieng 1997 ha ka por kumba 1 baje mynstep ha kaba u SI GC Marak (ha katei ka por uba long u in-charge ka Raliang Out Post) bad ki nongtrei jong u kila kem ïa u Emsalon Tariang na ka ïingsah jong u khlem kano-kano ka jingai ïa ka daw jong ka jingkem.
Ka kmie jong une u samla kala kynnoh ba ki pulit ki dei kiba la shoh khawiang bad kila shoh la bom bad byrngem byrsit ïa u khun jong ka hapoh ka Out Post bad ka kmie kala kyrpad ban pyllait ïa u hynrei kila kyntait ban pyllait.
Hynrei ha ka sngi kaba bud ha ka por 7 baje mynstep, ka kmie kala shem ba u khun jong ka u la thiah ïap bad lyngkhuid hapoh ka police outpost.
Ïa kane ka case la rejistar ha thanad Jowai Case No. 104(11)97 hapoh ka kyndon 302/34 IPC bad la tohkit bad aiti ïa ka charge-sheet ha u Officer In-Charge ka thanad Jowai uba ha katei ka por u dei u Inspector Nila Kalita.
Hadien ba la pyndep ïa ka jingtian bishar kaba la 29 snem, ka ïingkashari kala shem ba une uba shah kynnoh u la leh bakla.
Ka Ïingkashari u District and Sessions Judge NA Khan haba shim ïa ka rai ha ka sngi Balang, ula shem ba u Marak u la leh bakla halor ka jingïap jong u Emsalon Tariang ha Raliang Police Out Post , kaba jia ha u bnai Naiwieng jong u snem 1997.
