Shillong, Jymmang 20
Ki pulit ka thanad Sohra ha ka sngi Ba-ar, kila ïoh kem noh ïa uwei u briew ba kynnoh donkti tuh arshaka bad uba thmu ban leit die ïa kawei ka arshaka kaba u la tuh na ka thaiñ Laban sha Bangladesh.
Une u nongtuh uba la shah kem u dei uba la tip kyrteng kum u Banpliebok Khongsder, ba 26 snem, uba dei na Pomshutia, Pynursla, East Khasi Hills.
Katkum ka jingïathuh u Superintendent of Police ka East Khasi Hills, ki pulit Sohra ki dang talasi kali ha ka por ba wan ïaid kane ka arshaka bad haba u nongñiah u la ïohi ïa ki pulit, u la phai bad phet krad shaphang ka liang ban wan sha Shillong.
U SP u la ïathuh ba ki pulit kila kthong ïa kane ka arshaka bad kila ïoh ban bat ha ka thaiñ Mawjrong da ka jingïarap ki nongshong shnong ka thaiñ.
Kane ka arshaka ka dei ka Yamaha R15 rong saw kaba don ïa u registration number ML05-R-5346.
Ki pulit kila register case pyrshah ïa une u briew bad ka jingtohkit mynta kala ïaid shakhmat ban lapdien ruh ïa ka jingdonkti jong u ha kiwei ki kam tuk arshaka na Shillong.
