Shillong, Jymmang 20
Ka Voice of the People Party (VPP) East Jaiñtia Hills District ka la phah da ka jingthoh sha u Myntri Rangbah ka Jylla u Conrad K Sangma lyngba u Deputy Commi-ssioner ka East Jaiñtia ban pyndam noh ïa ka Shree Cement Project.
Na ka liang ka VPP ka la pynlong ka jingïakhih da kaba shong kyllain myngor hakhmat u mot Kiang Nangbah uba don ha phyllaw ka ophis u Deputy Commissioner ka East Jaiñtia Hills ban dawa ban pyndam noh ïa ka projek Shree Cement bad wanrah biang ïa ka kam tih dewïong.
Kane ka jingïakhih ka VPP ka la long ha ka sngi Balang ka 20 tarik Jymmang 2026 naduh ka por 10:00 baje mynstep haduh 5:00 baje janmiet. Ha kane ka sngi la wanlang ki MDC ka JHADC ban kyrshan lang.
Haba ai jingkren ha kane ka jingïalang, u Bah Damewanhi Rymbai uba dei u President ka VPP East Jaiñtia Hills District u la ong ba ka seng ka wan ban ïakhih da kaba jai jai hakhmat ka ophis u DC ka long ban pyndam noh ïa kane ka Shree Cement Company namar kam shym la ai jingmyntoi ïa ki paidbah hynrei ka pynduhnong ïa ki paidbah ka Elaka Nongkhlieh. U la ong ba ka Sorkar ka dei ban plie biang ban tih ïa u dewïong hynrei lada kam lah ban plie ka Sorkar ka dei ban khang lut ïa ki karkhana pynmih dewbilat namar ki la wan kjit ïa ka spah jong ki trai jylla.
Shuh shuh u la ong lada ka Sorkar kam lah ban leh eiei hapoh kine ki lai bnai, ka VPP kan sa mih paidbah ban khang lut ïa ki karkhana pynmih dewbilat ha East Jaiñtia bad sha Ri Bhoi ruh.
U Bah Damewanhi u la ong ba ha ka 22 tarik mynta u bnai ka VPP kan sa wan biang sha ophis u DC bad lada u DC u leit ban pynïaid ïa ka jingsngap ïa ka sur u paidbah (public hearing) kin sa peit kaei ba donkam ban leh.
Na ka liang ka Kong Deiwi Tongper kaba dei ka MDC ka la ong ba kane ka Sorkar MDA kam ju sngap ïa ki trai shnong namar kine ki kompeni pynmih dewbilat ki shu kular hynrei ki wan tang ban pynjot ïa ka mariang.
Ka la ai nuksa kum ha Elaka Narpuh ki briew man ka sngi ki la shu bam da u pum pum hynrei ki trai shnong ki ïohkam tang 30 percent katba 70 percent la trei da ki bar jylla.
