Nongstoiñ, Jymmang 20
Ka West Khasi Hills District Village Employment Council Association (WKHDVECA) kala kyntu ïa ka Sorkar ba kan pynkhuid noh ïa baroh ki ram ba dang sah jong ka skhim Mahatma Gandhi National Rural Employment Guarantee Act (MGNREGA) hashwa ban pyntreikam noh da ka kyrteng thymmai jong katei ka skhim kaba la tip kum ka VBGRAMG scheme hapoh West Khasi Hills district.
Ha ka jingïalang paidbah kaba la long ha ka 18 tarik mynta u bnai, ka association kala pynpaw ïa ka jingsngewkhia halor ka jingpynsahteng ïa ka pisa ba dang sah bad ha katei ka jingïalang da kawei ka sur kila shim ka rai ban dawa ba dei ban pyllait noh ïa baroh ki jingsiew ka Village Employment Councils (VEC), ba kynthup ïa ki skilled bad unskilled wages, material bills bad kiwei kiwei kloi katba lah. Shuh shuh ka association ka pynpaw ruh ba ïa ka skhim VBGRAMG dei ban pyntreikam tad ynda baroh ki jingsiew ba sahteng la dep siew lut bad ka Association ka pynpaw ruh da kaba ong ba ban pyntreikam ïa ka skhim thymmai khlem pat da lah ban pynkhuid lut ïa ki jingsiew ba sah kan wanrah jingeh ha ka ban pyntreikam ïa ki skhim da ki VEC ha baroh kawei ka district bad ka association ka kyrpad ruh ïa ki bor bahalor ban pynsangeh shwa ïa ka vendor tender process.
U Bah JTS Thongni, President ka Association u la ong ba kum ka association kala dep ruh ban ai da ka jingthoh sha ka DC jong ka WKHD ban pynsngew halor kitei ki mat kaba ka association ka sngewkhia na ka bynta ki shnong ki thaw khnang ba ka jingpyntreikam ïa ka skhim thymmai kan long kaba ïaid beit.
