Shillong, Nailar 13
U Myntri Rangbah ka Jylla Conrad K Sangma ha ka sngi Palei u la ong ba ka Sorkar ka dang don ha ka jingïakren bad ïamir jingmut bad ki kynhun bapher bapher halor ka projek Shree Cement bad kan sa shim ïa ka rai ba khatduh hadien ba la sngap ïa baroh ki liang, hadien ka jingai por ba 15 sngi jong ka KSU ban pyndam noh ïa ka ‘public hearing’.
U Conrad u la kdew ba watla ki don ki jingsngewkhia, hynrei bun ki nongshong shnong ha ka thaiñ jong ka projek ki la pdiang sngewbha ïa kane ka kam.
“Ngi dang ïakren bad ki seng bapher-bapher bad ngi peit ruh ïa baroh ki liang. Kumba phi tip, kawei pat ka liang jong ka jingïathuhkhana ka long ba ki don bun ki trai shnong ha kato ka jaka kiba don bynta, bad ki kmen shibun bad ki la kyrshan ïa ka kam karkhana kaba wan,” u la ong.
“Ngi hap ban shim ïa baroh ki nongshim bynta ha ka jingshaniah. Ngi hap ban pynthikna ba ngin kren bad baroh. Ka jingïakynduh ka dang ïaid, bad hadien ka jingïakren bad ïamir jingmut, ngin sa peit kumno ban ïaid shakhmat.”
Ha kaba ïadei pat bad ka jingkynnoh ba la tih surok ha ka por ba pynlong ïa ka jingbishar paidbah, u Conrad u la ong ba u Deputy Commissioner u la hukum ban tohkit bad ka Sorkar ka dang ap ïa ka kaiphod.
“La dep bthah ban pynlong ka jingtohkit. U Deputy Commissioner u la dep sdang ïa ka jingtohkit ïa kaei kaba la jia. Kumta ngi dang ap ïa ki kaiphod,” la ong u Conrad.
U la ong ruh ba ka Sorkar ka ïai plie ïa ka jingkhang ban ïakren bad ki kynhun kiba pyrshah ïa katei ka projek.
“Ngin plie ïa ka jingkhang jong ngi. Ngim ju khang ïa ki jingkhang jong ngi na ka bynta kino-kino ki jingïakren. Ngi la ju ngeit ba ka jingïakren ka dei ka lad kaba bha tam ban ïaid shakhmat. Lada don kino-kino ki jingeh, kino-kino ki jingsngewthuh bakla, ne kino-kino ki bynta kiba don jingbym ïasngewthuh, ngin long kiba kloi ban ïakren bad pynshai khnang ba baroh ngin lah ban ïaid shakhmat,” u la ong.
