Shillong, Nailar 18
U Chief Electoral Officer (CEO) ka Jylla, u Dr. B.D.R. Tiwari u la ong ba ki don palat 6.5 lak ngut ki nongthep ‘vote’ ha kylleng ka Jylla kiba hap ban ïaid lyngba ka jingpynshisha, kum shi bynta jong ka Special Intensive Revision (SIR), 2026 kaba dang ïaid shakhmat.
Kumba ka long mynta, ki jingsngap ‘Hearing’ ki dang ïaid shakhmat ha ka kyrdan jong ki distrik.
Ha ka jingïalang khmih bniah lyngba ka ‘online’ bad ki Deputy Commissioner, ki ERO bad ki AERO ha ka Lah Sngi U Blei, u CEO u la ong ba la pynmih ïa ki ‘notice’ bad la phah sha kito ki nongthep ‘vote’ ki bym lah ban pynïasoh ïa ki jinglum thup bad ka thup kyrteng jong u snem 2005 lane ha kaba la lap ïa ki jingbym biang ha ka por jong ka ‘data mapping’.
La pynithuh haduh 6,51,644 ngut kiba kum kine, kynthup ïa 2,22,786 ngut ki nongthep ‘vote’ ki bym don ‘mapping’ bad 4,28,858 ngut kiwei pat kiba ïakynduh ïa ki jingbym ïahap.
Na ka liang u CEO u la kyrpad ïa ki ophisar jong ki distrik ban pyntikna ba ki ‘notice’ kin poi sha ki nongthep ‘vote’ ha ka por kaba biang bad ba ïa ki jingsngap ‘Hearing’ la buh por ha ka rukom kaba ryntih khnang ba baroh kin ïoh ïa ka lad kaba biang ban wan mih hakhmat ki ERO ne AERO ha ryngkat ki kot ki sla kiba kyrshan.
La bthah ruh ïa ki ophisar Sorkar ban khmih bniah ïa kawei-pa-kawei ka ‘case’ katkum ka ‘Merit’ bad ym ha ka jingbun, haba kheiñ ba ki jingbym biang ki sdang naduh ka jingbym ïahap kyrteng bad ka jingbym ïahap haba ïadei bad ki kmie ki kpa haduh ki jingïapher rta hapdeng ki kmie ki kpa, ki khun, bad kiba shipara ba la lum thup ha ka kor treikam.
Ha ka jingïakren ba kyrpang ba man ka taïew bad ki nongmihkhmat jong ki seng saiñ pyrthei ka ri bad kito jong ka Jylla, u CEO u la khmih bniah ïa ka jingïaid shaphrang jong ki ‘Booth Level Agent’ (BLA) kiba la thung ban ïarap ïa ki nongthep ‘vote’. Haduh mynta ki don 1,810 ngut ki BLA kiba treikam, ha kaba ka NPP, BJP bad VPP ki don ïa ka bhah kaba heh tam.
Na ka liang u CEO u la kyntu ïa ki seng ban pynïar shuh-shuh ïa ka lad pynïasoh bad ban ïarap ïa ki nongthep ‘vote’ ban sngewthuh ïa ki ‘notice’ kumjuh ban peit bniah ïa ki jingtip (ba bniah) jong ki ha ka por ba don ki jingkam bad ki jingpyrshah.
Ka jingïalang ka la pynleit jingmut ruh halor ki jingpynbeit ïa ki jingeh. Ki nongthep ‘vote’ ki lah ban kynjoh lyngba u nombor ïarap 1950, kiwei pat ki nombor ‘mobile’, lane ban ‘book’ ïa ka ‘call’ bad la ki BLO lyngba ka ‘ECINET App’.
Ban pynneh ïa ka jingkhuid-jingsuba, ïa ki thup kyrteng ba ïadei bad ki jingkam bad jingpyrshah ba la ujor ha ki ‘Form’ 6, 7 bad 8, la thep ne ‘upload’ man ka por ha ka ‘website’ jong u CEO Meghalaya. Naduh ba la pynmih ïa ka ‘Draft Roll’, ki la don haduh 4,091 tylli ki aplikeshon haba ïadei bad ki jingkyrpad pynrung, pyndam, pynbeit ne pynkynriah.
Ki Electoral Roll Observer (ERO) ki dang leit jngoh ïa ki distrik ban peitngor kumno la pynpoi ïa ki ‘notice’, kumno la pynlong ïa ki ‘Hearing’, bad kumno la pynbeit ïa ki jingkam. La bthah ruh ïa ki ophisar jong ki distrik ban buh bha ïa ki jingthoh kiba biang bad ban pyntikna ba ka jingtreikam kan ïaid khlem da pynslem.
Haba pynmih ïa ka jingai jingmut, ka ophis jong u CEO ka la ong ba ki nongthep ‘vote’ kiba ki kyrteng jong ki ki paw ha ka ‘Draft Roll’ bad kiba la seisoh ha ka jingbuh dak ne ‘mapping’ bad ki jingtip ba bniah jong u snem 2005, kim donkam ban leh eiei.
Kito kiba ïoh pdiang ïa ka ‘Hearing Notice’ kim dei ban shu ieh kumto bad ki dei ban wan ha ryngkat ki kot ki sla kiba donkam.
Ka ophis ka la pynshai ba yn ym pyndam ïa kano-kano ka kyrteng khlem da pyntip bad ban ai ïa ka lad ban ïoh ban sngap ïa ki jingpynsngew.
Ki nongthep ‘vote’ kiba jah kyrteng ki dang lah ban aplai ban shah kynthup da kaba pyndonkam ïa ka ‘Form’ 6 ha ryngkat ka jingpynbna ha ka por jong ki jingkam bad jingpyrshah ka ban long haduh ka 4 tarik u Nailur. Ïa ka ‘Electoral Roll’ bakhatduh yn sa pynmih ha ka 7 tarik u Risaw.
Shuh shuh u CEO u la kyrpad ïa ki seng saiñpyrthei, ki shlem treikam tynrai, ki Dorbar Shnong, ki Nokma bad ki kynhun seng ha ka imlang-shalang ban ïarap pynphriang ïa ka jingtip bad ban pyntikna ba ka jingpynkylla kan long kaba kynthup lang bad kaba shai – da ka jingbuh thong ba yn ym don uwei ruh u nongshong shnong uba dei hok u ban shah iehnoh bad ba ka kyrteng ki bym dei hok kan ym ïoh jaka satia ha ka thup kyrteng.
