Shillong, Nailar 25
U Myntri ka tnad PHE, u Marcuise N. Marak ha ka Sngi Ba-ar u la ong ba ka Sorkar Pdeng ka la mang T.336.62 klur sha ka Meghalaya hapoh ka JJM 2.0 na ka bynta u snem 2026-27, hynrei u la pynshai ba ka dei tang ka jingmang bad ym ka jingpyllait pisa.
U la ong ruh ba ka jingpyllait pisa ka don ka jingïadei bad ki kyndon ba pyrkhing bad ka jingpyndep ïa ki skhim.
Da kaba kdew ïa ka shithi mang tyngka ba la pynmih da ka National Jal Jeevan Mission hapoh ka tnad Jal Shakti, u Myntri u la ïathuh sha ka Ïingdorbar ba ka jingphiah ïa ka jingmang pisa ka long – T.2.36 klur kum ka bhah ka Sorkar Pdeng pyrshah ïa ka ‘Additional State Share’ na ka bynta ka SVS, T.171.46 klur kum ka jingpyllait ba hashuwa na ka bynta ki SVS, MVS bad ki skhim pynpoi um lyngba ki ‘pipe’; bad T.140.78 klur hapoh ka ‘Reimbursement Mode’ na ka bynta ka MVS, T.15.73 klur na ka bynta ki kam ban kyrshan lang bad T.6.29 klur na ka bynta ka jingpeit bniah ïa ka jinglong-jingman ka um.
Haba pynskhem ba ka Meghalaya ka la leh kham bha ban ïa kiwei, u la ong, “Kane ha ka jingshisha ka dei ka jingmang pisa ïa ka JJM 2.0 na ka bynta u snem 2026-27. Haba pyrkhat ba T.336.62 klur, la mang bad buh kyrpang na ka bynta ka Meghalaya, kane ka jingmang ka long kaba kongsan bad kaba kham bun ban ïa ki Jylla ba don hajuh, ha ka Thaiñ Shatei Lam Mihngi lane ki Jylla lum.”
Ha kajuh ka por, u la maham, “Hap ban sngewthuh ba kane ka dei ka jingmang pisa jong ka JJM, ym ka jingpyllait.”
U Marak u la pynshai ba ka tnad Sorkar Pdeng kan pyllait ïa ka pisa tang hadien ba la pyndep ïa ki rukom treikam ba kongsan kynthup ïa ka ‘Financial Audit’ jong ki ar snem ba la dep, ban thaw ïa ka ‘Head of Account’ da u Accountant General bad kiwei.
“Kijuh ki rukom treikam kiba tikna ki treikam bad la bud ïa ki da baroh kiwei pat ki Jylla bad tang katto-katne ki Jylla ki la lah ban kohnguh, bad kham bunsien kine ki dei ki Jylla kiba pan biang ïa ka jingsiew (Reimbursement) na ka bynta ka jingai pisa jong ka Jylla ïa ka JJM,” u la ong.
U Myntri u la ong ba yn buh jingmut nyngkong eh ha ka ban pyllait sha ki skhim kiba la pyndep pura.
“Yn pyllait shuwa na ka bynta ki skhim ba la dep 100%, nangta 95-100%, nangta 90-95% bad kumta ter-ter. Kumta la kyrpad da ka jingsngewrit ba ki kontraktor ki lah ban shimkhia ha ka ban pyndep ïa ki skhim”, la ong u Marak da kaba bynrap, “Ka jingpyntreikam ïa ki skhim ba la pyndep ka long ruh ka kyndon kaba kongsan na ka bynta ki jingsiew bad ka rukom treikam ka dang ïaid shakhmat ban pyntikna ïa ka jingtreikam jong ki skhim JJM ba la pyndep.”
Katei ka jingkren ka long ka jubab halor ki jingsngewkhia ba la pynpaw da u MLA ka UDP na Nongpoh, Bah Mayralborn Syiem, uba la pynpaw ïa ka jingkyrduh pisa kaba ar snem hapoh ka JJM bad kaba la ïalam sha ka jingshateng jong ki ‘Bill’.
U Bah Syiem u la ong, “Ngi la ïohi ba ha kine ki ar snem ba la dep, kam don kano-kano ka jingai pisa hapoh ka JJM, kaba la ïalam pat sha ka jingud-jingnam. Bun ki kontraktor ki la ïakynduh man ka por ïa ka Sorkar na ka bynta ka jingpyllait ïa ki ‘Bill’ (jong ki), kynthup na ka bynta ka ‘Nongpoh Water Supply Scheme’.”
Shuh shuh u la pan ïa ka jingkular halor ka jingpynkhuid ïa ki jingsiew ba dang sah bad kyntu ïa ka Sorkar ban buddien na ka Sorkar Pdeng ban pyllait kloi ïa ka pisa.
