Shillong, Nailar 25
Ka Hynñiewtrep Integrated Territorial Organi zation (HITO), East Khasi Hills, ha ka sngi Ba-ar ka la leit ban ïakynduh ïa ki nongmihkhmat ka Jio Telecom bad ban dawa ïa ka kompeni ban ai ka lad kaba kham kyrpang ïa ki samla shnong ka jylla ha ka liang ka kam bad ka jingtrei.
Ka HITO ka la dawa ba ki samla shnong kiba don ïa ki jingnang jingstad, ki sap kiba biang, kidei ban ïoh ka lad ban aplai bad ïoh bynta ha ki kam bapher bapher hapoh ka kompeni, khamtam ha ki kam kum ka Human Resources (HR), Supervisor, Manager bad kiwei-kiwei ki kyrdan kam, katkum ki jingdonkam bad ki kyndon treikam jong ka kompeni.
Ka HITO ka la pynsngew ïa kane ka jingdawa, namar ka jingduna bad jingkyrduh kam ha ka jylla, kaba ktah kyrpang ïa ki samla kiba la dep pule bad kiba don ki sap hynrei kim ïoh ka kam kaba biang hapoh ka jylla.
Ha ka jingïakynduh, ki nongmihkhmat jong ka Jio Telecom ki la pdiang ïa ka jingpynsngew jong ka HITO bad ki la ai jingkular, ba kin pyrshang ban ai lad ïa ki samla shnong kiba biang ka jingnang jingtip, katkum ki kyndon bad ki jingdonkam jong ka kompeni.
Ka HITO ka ai khublei ïa ka Jio Telecom halor kane ka jingkular bad ka kyrmen ba kane kan long ka sienjam kaba bha, ban wanrah ki lad kiba kham bun bad kiba ai jingïarap ïa ki samla ka jylla.
Ka HITO ka kyntu ruh ïa kiwei ki kompeni bad ki business establishment kiba treikam hapoh Meghalaya ban shim ïa kajuh ka bynta, da kaba ai ka lad kaba hok bad kaba ïaryngkat ïa ki samla shnong, kiba la dep pule bad kiba don ïa ki sap, khnang ban kyntiew ïa ka ïoh ka kot bad ka lawei jong ki samla.
Ka HITO East Khasi Hills kan dang ïai ïeng ban ïada bad ban pynsngew ïa ki hok, ki jingdonkam bad ki jingangnud jong ki samla ka jylla, khamtam ha ka liang ka jingïoh kam bad ka jingkiew ha ka ïoh ka kot.
