Jowai, Nailar 25
Ki pulit ha kine ki sngi ki la ïoh ban kem noh ar ngut ki briew ba kynnoh dei snar nongtuh arshaka bad ruh ban ïoh kurup noh ïa ki saw tylli ki arshaka na ki ar tylli ki jaka.
Katkum ka khubor, la ong ba ha ka sngi Nyngkong jong ka taïew hadien ba la ïoh ïa ka jingtip ba thikna ha kaba ïadei bad ki arshaka kiba suba shah rong tuh, ki pulit ka Amlarem ha ka 24 tarik Nailar ki la pynlong ka jingpynap shrip bad ïoh ban bat noh ïa ar tylli ki arshaka kiba don ïa u nombor AS01-FK-3482 bad AS26-A-9873 na Ladjaplem.
Ha kane ka jingjia ki pulit ki la ïoh ban kem noh ïa ki arngut ki briew kiba la tip kyrteng kum u Pynshngain Jyrwa (23 snem) uba dei na Umsning-Mawkhan bad u Rijiedstar Shylla (27 snem) uba dei na Umsning-Sohkyndur, Ri Bhoi District.
Ha ka jingtohkit bniah la lap ba kine ki arshaka ba la ïoh bat ki dei kiba la shah rongtuh na Changsari, Assam, ha kaba ïa ka case la register hapoh ka kyndon 303(2) jong ka BNS.
Ha ka 25 tarik Nailar la aiti noh ïa kine ki arshaka kumjuh ïa kine ki briew kiba la shah kem sha ki bor pulit ka Changsari, Assam ban leh ïa kaba donkam.
Ha kane kajuh ka sngi ki pulit ka thanad Dawki ki la ïoh ban bat sa artylli ki arshaka kiba suba shah rongtuh kiba don ïa u nombor NL07-EB-8467 bad AS05-S-3378 ïa kiba la rah noh sha thanad na ka bynta ka jingpynshisha.
Na ka liang u Superintendent of Police ka West Jaiñtia Hills u la kyntu ïa ki paidbah ba kin long kiba phikir bha ha kaba ïadei bad ki kali jong ki na ka bynta ka jingshngaiñ bad ban pyntip halor kino kino ki suba kam tuh sha ki thanad kiba hajan eh lane da kaba phone sha u nombor 112.
