Shillong, Nailar 25
U Myntri Rangbah ka Jylla, u Conrad K. Sangma ha ka Sngi Ba-ar u la ong ba ki don 666 tylli na ki 6,188 tylli ki Anganwadi Centre ha ka Jylla kiba dang treikam na ki ïing-wai ne ki ïingmala ba shipor, bad ka Sorkar kan ym pynlut ban pynbha ïa kine ki jaka ba la shim wai namar ka jingbym don jaka.
Haba jubab ïa u MLA ka TMC, u Dr. Mizanur Kazi, u Conrad u la ïathuh sha ka Ïingdorbar ba ka jingshna bad jingpynbha ïa ki 2,148 tylli ki ‘Centre’ la shimkhia ha ryngkat ka jingïatreilang bad ka tnad pynroi nongkyndong bad ka MGNREGS, ha kaba T.64 klur la mang hapoh ki Externally Aided Project (EAP).
“Na ki 2,148 tylli ki ‘Centre’, 1,670 tylli ki la dep bad ïa kiba sah, shen yn sa pyndep ïa ki. Ngim pynlut pisa ban pynbha ïa ki jingtei jong ki ïing ba shipor,” la pynshai u Myntri Rangbah.
U la ong ba ïa ka jingkyntiew kyrdan la leh hapoh ka Meghalaya Early Childhood Development Mission.
Halor ka bam ka dih kaba tei, u Myntri Rangbah u la ong ba la pynbiang shuh ïa ka bam kaba tei na ka bynta 25 sngi ha ka shi bnai – ki jingbam ba la shet bha na ka bynta ki khynnah hapdeng 3-6 snem bad ka jingbam ban rah sha ïing man ka taïew na ka bynta ki khynnah kiba dang 6 bnai haduh 3 snem, ki longkmie kiba armet, ki kmie ba ai buiñ khun bad ki khynnah kynthei.
Ka Jylla shen kan sa ai pylleng arsien ha ka shi taïew kum shi bynta jong ki jingbam ba la shet bha.
U Conrad u la ong ba ki jingpeit bniah ba man ka por bad ki ‘Social Audit’ la leh ban peit bniah ïa ka jingbha bad ka jingsam biang por, bad kyntu ïa ki MLA ban pyni ïa ki jingduna.
Da kaba kdew ïa ki jingtip jong ka NFHS, u la ong ba ka jingduna ha ka rynïeng ki khynnah kiba hapoh 5 snem ka rta ka la hiar na ka 46% sha ka 35% ha ki lai snem, bad ka jingkheiñ kyllum jong kiba duna bam ka la hiar sha ka 36%, ka jinghiar kaba kham heh ban ïa ka jingkheiñ ha ka ri baroh kawei.
“Ka don ka jingpynsngew kaba manbha hynrei ngi kwah ban pynhiar ïa ka sha ka ‘Zero’. Ngi la sdang ïa ka prokram kaba 1000 sngi kaba kynthup ïa i khyllung iba naduh dang kha haduh ar snem ka rta,” u la ong bad bynrap ba baroh ki ‘Center’ ki don ka jaka shet jingshet wat lada ym don ki kamra shet jingshet ba kyrpang.
