Shillong, Nailar 25
U Myntri ba dei peit ïa ka tnad ka koit ka khiah ka Sorkar Jylla Bah Wailadmiki Shylla u la ong ba ki don 50 ngut ki samla pule kiba la shah pynrung ha u snem nyngkong jong ka Shillong Government Medical College.
Haba jubab ïa ka jingkylli jong u nongïalam ka Liang Pyrshah u Dr Mukul Sangma hapoh ka ïingdorbar thawaiñ ha ka sngi Ba-ar, u Bah Wailadmiki u la ong, ki jingtei na ka bynta kane ka kolej ki long katkum ki kyndon jong ka NMC MSR 2023, ha kaba ïa ki jingtip ba bniah la wanrah hapoh ka ïingdorbar.
U la ïathuh ba ka Sorkar ka la mynjur ïa 179 tylli ki kam na ka bynta kane ka kolej doktor – ba kynthup ïa kawei ka kam jong u Director, u Dean, u Medical Superintendent, u Chief Administrative Officer, u Clinical Psychologist, u Statistician bad u Chief Accounts Officer-cum-Financial Advisor.
Na ki kam hikai, 17 tylli ki dei ki Professor, 27 tylli ki Associate Professor, 41 tylli ki Assistant Professor, 40 tylli ki Senior Resident, 22 tylli ki Junior Resident bad 25 tylli ki Tutor/Demonstrator.
Kane ka kolej ka la sdang treikam naduh u snem pule 2025-26.
