Shillong Nailar 28
U MLA ka VPP na Mawlai constituency u bah Brightstarwell Marbaniang u la kyntu ia ka sorkar jylla ba kan pyndonkam ia ka jaka jong ka kaba don ha Mawkhanu na ka bynta ka jaka theh ñiut kaba thymmai da kaba ong ba ka jingpynslem ia ka projek Nonghali ka mut ka jingbteng ka jingjynjar ia ki briew kiba sah hajan ka jaka theh niut ha Marten.
Haba wanrah ia ka jingkylli bynrap hapoh ka iingdorbar thawain kaba la kut mynta ka sngi, u bah Marbaniang u la ong ba wat la u kmen ba ka Nonghali ka don ha ka jingpynkhreh, hynrei ka jingshim jaka ka dang hap ban sdang bad kan shim por shuh shuh.
U la kdew ba ka sorkar ka la don lypa 941.54 akar ha ka sor New Shillong, kumba la kdew ha ka jubab ha ka sngi Palei, ha kaba palat 800 akar ki jaka ba iajan tang ha Mawkhanu.
“Kane ka long palat lai square kilometer, kaba kham heh ban ia ka European Ward,” u la ong.
U Bah Marbaniang u la ong ba u la ju pynpaw bunsien ia ka jingktah jong ka Marten ia ka koit ka khiah, ka kamai kajih, ka jinglong ka lyer bad ka jingkordor ka jaka ha Mawlai.
“Da ki snem ki briew jong nga ki la mad jingeh namar ka jingsma kaba sniew. Ym shym la leh ia ka jingpeit bniah ia ka koit ka khiah jong ki khynnah, ki longkmie ba armet bad kiwei kiwei kiba sah ha kylleng ka Marten” u la ong.
Haba kylli sa katno snem ki nongthep vote jong u kin hap ban shah shitom, u Marbaniang u la kyntu ïa ka tnad Urban Affairs ban buh kyrpang ïa kawei ka bynta jong ka jaka Mawkhanu na ka bynta ka jaka bret jaboh kaba long katkum ka juk stad mynta, kaba ïahap bad ka mariang, na ka bynta ka jingbit jingbiang ka nongbah Shillong.
Haba jubab ia ka jingkylli banrap ba la buh da u MLA ka VPP na Mawlai constituency u bah Brightstarwell Marbaniang, u bah Sniawbhalang Dhar uba dei u symbud myntri rangbah ka jylla uba dei peit ia ka tnad pynroi sor u la kubur ia ka jingpynslem ia katei ka projek jaka pynlang niut ha Nonghali, kaba la khot tender nyngkong eh ha u bnai Lber 2022.
“Saw ngut ki trai jaka ki la wan shakhmat bad ka kynhun treikam hapoh u Deputy Commissioner ka la jurip ia baroh ki jaka. La shem ba ka Nonghali ka long kaba lah ban leh katkum ki kyndon,” u la ong.
U Dhar u la ong ba ka jingpynslem ka dei kham bunsien namar ka jingpyrshah jong ki paidbah, wat hapdeng ka jingdawa kaba jur bha ia ki jaka pynlang jaboh kiba kham bha.
“Ki briew ki wan sha nga ban dawa ia ki jaka bret niut ban pynlong khuid ia ka sor, hynrei haba ngi pynher ia ka EOI, kijuh ki kynhun ki pyrshah ia ka. Kane ka dei ka jingeh kaba ka tnad ka iakynduh,” u la ong.
Haba batai bniah ia ka por, u Bah Dhar u la ong ba ka jingpynsngew paidbah ha ka 2 tarik Iaiong 2025, ka la mad ia ka jingpyrshah na ki trai shnong Nonghali bad na ka Synjuk Ki Nongsynshar Shnong Parmawshken, kaba la pynlong ia ka sorkar ban pynjlan ia ka.
“Ngi la burom ïa ki jingsngewkhia jong ki bad ngi la pynkylla por biang sha ka 23 tarik u Nailur, 2025, hadien ba ngi la pynlong shuh shuh ïa ki prokram pynsngewthuh bad jingïamir jingmut ha ki kyrdan bapher bapher,” u la ong.
U la iathuh ruh ba ka jingbishar kaba ar ka la dep da kaba jop, hynrei ka kam ka la leit sha ka iingbishar.
“Don kiba la leit sha ka iingbishar pyrshah ia ka. Ka High Court ka la pynbeit ia ka mukotduma ha ka liang jong ngi ha ka 14 tarik u Naitung,” la ong u Dhar.
U la ong ba ka tnad mynta ka dang pynkhreh ia ka jingpeit bniah ia ka jingktah ia ka mariang kaba khatduh, ka Environment Management Plan bad ka Detailed Project Report ban ai sha ka State Level Environment Impact Assessment Authority na ka bynta ban pynkhuid ia ka mariang, hadien kane yn sa sdang ban shim jaka.
