Shillong, Nailar 28
Ki nongshet ja skul kiba don hapoh ka shatri Union of Cook Cum Helpers PM-Poshan jong ka Jylla ha ka sngi Thohdieng ka la phah da ka jingthoh sha u MP Rajya Sabha u James PK Sangma ban kyrpad ba un ïakren sha ka Sorkar Pdeng haba ïadei ka mat jingdawa jongki.
Ka Union of Cook Cum Helpers PM-Poshan ka la buh ïa ka mat jingdawa lyngba u Myntri ka tnad pule puthi ka Sorkar Jylla u Bah Lahkmen Rymbui sha ka Sorkar Pdeng, kaba long halor ka jingsiew kaba ki ïoh na ka Sorkar Pdeng kaba long tang T.900 shi bnai, kaba ki la dawa ban kyntiew sha ka T.9000 shi bnai.
Haba kren ha ki nongthoh khubor u Bah Khroo L Pariat, Adviser ka Union, u la ïathuh ba u James PK Sangma u la pynpaw ba u Myntri Rangbah ka Jylla u Conrad K Sangma u la ïakren ïa u ba un shimkhia ban ïakren haba ïadei ka jingsiew ki nongshet ja skul ka Jylla.
U Bah Khroo u la ong ruh ba na ka liang u James u la kular ba un sa leit sha nongbah Delhi ban ïa kynduh ïa u Myntri Rangbahduh ka Ri u Narendra Modi kumjuh ïa u Myntri ka tnad Pule puthi ka Ri u Pralhad Joshi ban ïakren haba ïadei ka jingsiew jong ki nongshet ja skul kiba don ha ka thaiñ shatei lam-mihngi ka Ri.
Shuh-shuh u la ïathuh ba ka jingïakren hapdeng ki nongïalam ka kynhun ki nongshet ja skul bad u James ka long kaba sngewtynnad ha kaba u la pynpaw ba kane ka kam ba ki nongshet ja skul ki trei ka la ïarap bha ïa ki khynnah skul ka Jylla haba ïadei ki longïing kiba wan na ki longïing kiba duna ka ïoh ka kot bad kaba la ïarap ruh ha kaba ïadei ka jingshngaiñ jong ki khynnah skul kiba don ha ka thaiñ.
Haba ïadei ka jingpynbna ba kin sdang ban ïakhih da kaba sangeh treikam, u Bah Khroo u la ïathuh ba kin sdang ban sangeh treikam naduh ka 1 tarik Nailur bad kin ïai bteng ban ïakhih haduh ban da ïoh ïa ka rai kaba shai na ka Sorkar Pdeng haba ïadei ka jingdawa jongki.
U la buh ka jingkyrpad ïa ki Head Teacher’s, ki School Managing Committee kiba don ha ka Jylla kumjuh ha ka thaiñ shatei lam mihngi ba kin ai ka jingïatreilang khnang ba kan long ka jingmyntoi ïa ki khynnah skul ka Jylla baroh kawei.
