Shillong, Nailar 28
Ka Voice of the People Party (VPP) State Youth Wing hapoh ka jingïalam u President, Bah Marbud Dkhar bad u Secretary, Bah Nathaniel Mawrie, ka la leit phah pynsangeh shipor ïa ka Counselling Admission jong ka BSc NEIGRIHMS College of Nursing 2026-27, hadien ka jinglap ïa ka list kaba don kumba 53 ngut ki khynnah pule kiba mih kyrteng ha ka counselling bad admission ha katei ka college bad ka party ka la lap, ba ka khlem don kano-kano ka jingpyntrei kam ïa ka Reservation Quota na ka bynta kane ka jingïadon admission bad kiba mih kyrteng kidei kiba nabar ka jylla.
Ka VPP ka la lap ruh, kumba 40 tam dei ki kyrtong shynrang kiba nabar ka jylla.
Ka VPP SYW dang step ka lah leit ban ïa kynduh ïa ka Principal jong katei ka College of Nursing, ban pan ki jingpynshai kiba bniah bad dei hadien ba la tih bniah bha, la lap ba naduh ba seng ïa katei ka College naduh u 2006, ka khlem don kano-kano ka Reservation Quota haba pynrung admission kumba long ha kiwei ki Skulbah central.
Na ka liang ka Youth Wing ka la shimkhia halor katei ka mat bad ka lah ïoh ban ïa kynduh ruh bad u Dean (Academics) ka NEIGRIHMS, U A. Mishra, hadien ka jingïathir kaba bniah, na ka liang ka jong u ruh u la kubur ïa ka jingdawa ka VPP SYW, ba dei ban phah pynsangeh shipor tad haduh ba kin da lah ban pynbiang ïa ka Quota System, ba kin sdang ïa ka admission.
Na ka liang u Dean u lah leit ïa kynduh kyrkieh ïa u Deputy Director bad ïa u Director ban rah ïa kane ka mat, kaba ka VPP SYM ka buh hakhmat ka ophis treikam jong u.
Kumta na ka VPP SYW, ka pynpaw ka jingbynniaw ïa ka jingbym shimkhia jong ka Administration ha NEIGRIHMS bad kumjuh ruh ka Sorkar Jylla, ka bym shimkhia ban peit ïa kane ka mat bad ruh ïa ki Sorkar kiba la leit kiba wanrah ïa ka NEIGRIHMS ha kane ka Jylla, namar kumba long ha kiwei ki Jylla, ka Sorkar ka shimkhia naduh kaba sdang ban ïoh nong ki trai ri trai muluk.
Na ka liang ka VPP SYW, kan sa leit buddien biang ïa kane ka mat ha ki sngi ban wan bad u Director kumjuh ruh bad u MP ka Lok Sabha (Tura Konstitwensi).
Haduh mynta hi, ka VPP SYW ka dawa beit ban pynsangeh shuwa ïa kane ka Counselling bad admission namar kane kam dei shuh tang mynta bad wat ha ki snem ba lah dep ruh ka ïai jia, ba ymdon kiba na ka Jylla kiba ïoh admission bad la dap da kiba na kiwei pat ki jylla.
“Kiba bun na kine kiba ïoh mynta ka kynti ruh, kidei ruh ki shynrang kiba na shabar bad kane ruh ka lah ban buh jingeh ïa ki nongtrei kynthei bad ruh ïa ki nongpang kynthei kumba ïohi ïa ki jingjia bad jinglong jingman ha ki sngi ba lah dep,” la bynrap ka VPP.
