Shillong, Nailar 28
Ki dkhot ka Hynñiew-trep Integrated Territorial Organisation (HITO), ka la ïoh bat ïa ki lai ngut ki Bangladeshi na kawei ka kali Hyundai Venue, kaba don ïa u registration nombar ML 05 AF 4614, katba dangthmu ban rung sha kane ka Jylla.
Ka jingioh bat ka HITO, kadei hadien ba ki la pyn-ap shrip bha ha ka thaiñ Mawryngkneng, hynnin ka janmiet ka 27 tarik u Nailar 2026.
Ka jing-ap shrip ki dkhot ka HITO, kadei namar ba ki la ïoh pdiang ka jingujor na ki nongshong shnong, ba la suba ba katei ka kali, kadei kaba kit ïa ki nong Bangladeshi ban rung sha kane ka Jylla.
Ha ka jingtohkit ka seng, ka la lap shisha ba kitei ki lai ngut kiba la ithuh kyrteng kum u Halim Khan, u Rafiq Miah bad u wei pat uba dang hapoh ka 18 snem ka rta, kidei kiba wan na Bangladesh bad kiba thmu ban leit sha Delhi, da kaba siew 21 hajar tyngka sha u wei u briew uba la ithuh kyrteng kum u Kabir.
Ha ka jingtohkit na uba niah ïa ka kali pat, u la phla ba u la shim 8 hajar tyngka na ki bad uba la kam ruh um shym tip ba kin leit shaei, hynrei u la kyntiew ïa ki namar ka jingkyrduh kam, kaba la pynlong ïa ki nongïalam ka HITO ban suba jur ba u dei u dalal.
Na ka liang ka HITO, ka la aiti noh ïa kine ki briew sha ki pulit ka Mawryngkneng Police Station ban leh ïa kaba donkam.
