Shillong, Nailar 30
U Myntri Rangbah ka Jylla, u Conrad K. Sangma ha ka Sngi Thohdieng u la ong ba ka tnad ‘Excise’ ka la kiew ha ka jingïoh lum khajna jong ka, kata na ka T.180 klur, 8 snem mynshuwa sha ka T.500 klur tam mynta, bad kane ka la lah ban tam ïa ka T.1000 klur.
Haba kren hadien ba la plie ïa ka ophis thymmai jong ka tnad ‘Excise’ ha Lower Lachaumiere, u Sangma u la ong ba ka jingkiew ka dei namar ka jingmih na ki jingpynkylla ba ïaineh bad ka rai kaba kongsan ban pynïasoh lang ïa ka ‘Excise’ bad ka VAT.
“La shim ïa ka rai kaba kongsan ban pynïasoh lang ïa ka ‘Excise’ bad ka VAT kaba la khmih lynti ba kan nang pynkiew shuh-shuh ïa ka khajna. Ha u Nailar 2026, ka Kynhun Myntri ka la mynjur ban pynwanlang ïa ka VAT halor ka kyiad sha ka ‘Excise Duty’ da kaba pynkylla ïa ka ‘Section’ 44 bad ka ‘Schedule’ V jong ka ‘Meghalaya Value Added Tax Act’,” u la ong.
U la ong ruh ba ka jingthmu jong ka Sorkar ka long halor ki jingkylla kiba ïaineh khlem da pynthut ïa ka basa-jingim kaba la don lypa bad ban pyntikna ba la kitkhia ïa baroh ki nongshim bynta.
U Myntri Rangbah u la ong ba ïa ka jingmih na ka tnad la pyndonkam ban bei tyngka ïa ki prokram ai jingïarap sha ka imlang-sahlang, kynthup ka jingtei ïa ki skul, ki ‘Hospital’ bad ki jingthmu ba ïadei bad ka ‘Safe Motherhood’.
U Sangma u la ong ba kane ka dei ka sngi jong ka jingrakhe namarba ka tnad kaba la treikam na ki jingtei ba shipor la palat 50 snem, khatduh ka la ïoh ïa la ka jong ka ophis treikam.
Kane ka ïingmala kaba shongdor T.14.55 klur ka kynthup lang ïa ka ‘Laboratory’, ‘Enforcement Wing’, ‘Integrated Excise Management System’ bad ka ophis jong u Commissioner ha kawei ka jaka, ha kawei ka liang ka ban pynbha ïa ka jingtreikam bad ka jingïadei paidbah.
Ha kane ka sngi, la don lang ruh u Myntri ka tnad Excise, u Brening A. Sangma, u Chief Secretary ka Jylla, u Dr. Shakil P. Ahammed bad kiwei-kiwei.
