Shillong, Nailar 30
Ki nongïalam ba ha khmat ka Khasi Students union (KSU) ba kynthup ïa u Samla Raymond Kharjana, President, u Samla Pynkmenlang Sanmiet, Vice President, u Samla Reuben Najiar, General Secretary ki la ong, ba kim sngew phylla ïa ka jingthep mukotduma pyrshah ïa ki, hynrei ki angnud ba ki mat jingdawa kin ïaid sha khmat haduh ba kin da urlong.
Kane ka jingkren jong ki, ka la long na ka kali kaba mut kit biang ïa ki sha Jail, hadien ba la wan ïalam biang bad tian bishar ïa ki ha Court of District and Sessions Judge, Shillong, ha ka 29 tarik u Nailar, 2026.
Haba kren sha ki lad pathai khubor hadien ba la mih na Iingkashari, ki nongïalam ki la ong “Ki bor Sorkar ki lah ban set along ïa ki dkhot ka KSU, hynrei ym pat ïa ki mat jingdawa ka seng”.
Kane ka jingwan ïalam tian bishar, kadei hapdeng ba kine ki lai ngut ki dang don ha ka Judicial Custody ba 14 sngi, na ka jingshah kem jong ki myn ha ka miet 19 tarik u Nailar, 2026, kaba la long katto-katne kynta hadien ka rally arshaka jong ka seng, ha kaba la mih ki jingjia huri-hura.
“Ka jingïaid lynti ka long beit kum u shiah tyrha kumne harum. Phi lah ban set along ïa ki nongïalam ka KSU hynrei kin nym lah ban set along ïa ki mat ba la rah da ka KSU,” ki la bynrap.
Haba kylli, ki la jubab “Ka biang ka jingkhot tian bishar ka Sorkar bad ngin nangïai buddien ïa ki mat jingdawa shakhmat”.
