Shillong, Nailar 30
U General Secretary ka UDP Sengkmie u Bah Titosstarwell Chyne u la pyntip ba ka UDP ka dang shu khot ïa ka jingïalang jong baroh khadar ngut ki MLA ha ka taïew ba dang shu dep ban ïakren halor kine ki kam ba mih khubor.
U Bah Titos u la ong ba ki don ki briew kiba thmu ban pynklumar ïa ka UDP ban pynsaphriang ïa ka khubor ba ki khyndai ngut ki MLA ka UDP kin rung noh sha ka BJP.
“Kane ka jingpynklumar ka long namar ki don ka jingmyntoi jong ki shimet takadaw ki kwah ban pynklumar ïa ka UDP,” u la ong.
U Bah Titos u la pyntip ba ha ka taïew ba dang shu dep ka la don ka jingïalang jong ki MLA ka UDP ha kaba ki la pynpaw ba kim shym la don kum kata ka jingthmu hynrei ki kam ïing hangne hangtai ka jingbym hun ka don beit lada dei ha kano kano ka seng saiñpyrthei ne ha kano kano ka ïing ym lah kiar ïa kata.
“Ka jingmih kum kine ki khubor pynsaphriang ka dang pynkhlaiñ ïa ka UDP ha kane ka ilekshon shiteng samoi ka MP Lok Sabha ban sa long shen,” u la ong.
Kum ban shu pynkynmaw ka khubor kaba mih ha ka sngi Saitjaiñ kaba dei ka 29 tarik Nailar 2026 la ïathuh ba ki 9 ngut ki MLA ka UDP kin sa ïakynduh mynta ka sngi U Blei ka 30 tarik Nailar 2026 bad u Amit Shah, u Myntri ka tnad Kam Pohïing ka Sorkar Pdeng ha Delhi ban pynthikna ban rung sha ka BJP ryngkat ki katto katne ngut ki MLA ka TMC.
Ki khubor ki ïathuh ba napdeng ki 12 ngut ki MLA ka UDP, ki ban sah kin long sa tang u Bah Metbah Lyngdoh uba dei u President, Bah Renikton Lyngdoh bad Bah Nujorki Sungoh.
