Mairang, Nailar 30
Ha ka sngi Saitjaiñ jong ka taïew ka National People’s Party (NPP) kum ka jingpynkhreh ban ïakhun ïa ka ilekshon MP shiteng samoi na Shillong Parliamentary Konstitwensi ka la hiar sha ka shnong Lawbyrtun kaba hap hapoh Mawthadraishan konstitwensi na ka bynta ban pan jingkyrshan ïa la u kyrtong jong ka seng u Dr. DRL Nonglait uba ka la pynïeng ban ïakhun ha ka MP ilekshon shiteng samoi.
U Bah Sniawbhalang Dhar, uba long u Symbud Myntri Rangbah ka Jylla bad ruh u nongïalam ka NPP haba ai jingkren ha ka jingïalang u la ong, “Ka NPP ka don ka nongrim kaba nyngkong eh ka long, ban burom para ma ngi bad kaba ar ka seng kam ju kren beiñ ïano ïano namar ka bunkam ban trei.”
Shuh shuh u la pynpaw ruh ba ka seng ka shim ïa ka sienjam, ba kiwei kim pat shim ka long ban pass ïa ka resolution ban pyrshah tyngeh ïa u uranium, sa kawei pat ka long ban pynlong aiñ ïa ka ktien Khasi khnang ba kin lah ban kren noh da ka ktien Khasi hapoh Assembly.
U la ong ruh ba ka seng ka la jied ïa u Dr. Nonglait hakhmat ka jingmynjur lang ki paidbah, kumta u la ong ba na rilum Jaiñtia, na Ri bhoi bad Ri Khasi baroh ki la kyrshan, kumta kum ki trai shnong ki dei ban pyntam bun ha kane ka ilekshon mynta.
Ha katei ka sngi nalor u Bah Sniawbhalang Dhar, la donlang ruh u kyrtong ka seng u Dr. D.R.L. Nonglait, u Working President ka NPP Eastern West Khasi Hills District Bah Nathaniel Marshiangbai, ka President NPP Mawthadraishan Kong Biolinda L Nonglait, kiwei ki nongkitkam ka seng ha ryngkat ki spah ngut ki nongkyrshan ka seng kiba la wan ban sngap ïa ka jingïalang.
