Shillong, Nailar 30
U Bah Wankitbok Pohshna uba dei u General Secretary ka BJP Meghalaya State Unit u la ong ba um don jingtip ïa ka jingthmu ki MLA ka UDP bad TMC ban rung BJP.
U la ïathuh ba wat u President ka BJP Meghalaya State Unit u Rikman G Momin ruh um don jingtip eiei namar ma u ruh u don ha Shillong.
“Lada kine ki MLA ka UDP bad TMC ki rung sha ka BJP kan long shisha ka jingkyrmen ïa ka BJP hapoh ka Meghalaya,” u la ong.
U la ïathuh ba haduh mynta ki nongkitkam ka BJP na Meghalaya kim don jingtip eiei hynrei ki lah ban ïakren bad ki nongïalam na Delhi.
Ka BJP haduh mynta ka don ar ngut ki MLA kata u Bah AL Hek bad u Bah Sanbor Shullai bad lada kine ki MLA ka UDP bad TMC kin rung sha ka BJP kin dang ïoh biang ka bhah Myntri na ka Sorkar MDA hapoh ka jingïalam ka NPP.
Kum ban shu pynkynmaw ka khubor kaba mih ha ka sngi Saitjaiñ kaba dei ka 29 tarik Nailar 2026 la ïathuh ba ki 9 ngut ki MLA ka UDP kin sa ïakynduh ha ka sngi U Blei ka 30 tarik Nailar 2026 bad u Amit Shah, u Myntri ka Sorkar Pdeng ha Delhi ban pynthikna ban rung sha ka BJP ryngkat ki katto katne ngut ki MLA ka TMC.
Ki khubor ki ïathuh ba napdeng ki 12 ngut ki MLA ka UDP, ki ban sah kin long sa tang u Bah Metbah Lyngdoh uba dei u President, Bah Renikton Lyngdoh bad Bah Nujorki Sungoh.
