Shillong, Nailar 30
Haba kyntait ba haduh mynta kam don eiei kum kata ka khubor, u MLA ka United Democratic Party (UDP) na Nongpoh u Bah Mayralborn Syiem u la ong ba ha ka politik te ka jingkhot ne ka jingïakren ka don beit.
“Uba khot u bun, baroh ki seng saiñpythei ki khot, wat ka NPP ruh ka la khot, kumjuh ruh ka Congress. Ha ka politik ngim lait na kine, namar ka jingkhot ka jingïakren ka don beit, hynrei haduh katno ka long kaba shisha, ka por kan sa batai,” la ong u Bah Mayralborn haba kren bad u nongthoh khubor.
Lah ban kdew hangne, ba ha kine ki sngi ki la mih bad saphriang bha ki khubor ba ki don haduh khyndai ngut kita ki MLA jong ka UDP lem ruh bad ki katto katne ngut ki MLA jong ka TMC kiba la thmu ban pynïasoh noh bad ka Bharatiya Janata Party (BJP).
Halor kane ka jingsaphriang ki khubor, u Bah Mayralborn u la ong tang ba kum ki MLA ka UDP ki leit ban ïakren halor ka mat FCRA bad u Amit Shah, ki la saphriang pynban kum kine ki khubor.
“Haduh mynta te kam don eiei kaba kum kata. Nga don bad bun kam ha konstitwensi, bad nga don ha ïing ha Nongpoh,” la pynpaw une u MLA ka UDP na Nongpoh.
“Haba la jan ka ilekshon kaba sah sa kumba shisnem shiteng, ka jingïarung ïamih, ka jingkhot kan don beit hynrei ha kaba kut ngi hap ban trei bha na ka bynta u paidbah bad ban ïadon bad shakri ïa u duk u rangli. Lada don eiei te ki paidbah ha kine ki sngi kin sa tip hynrei kumba ka long mynta kam don eiei satia,” la bynrap u Bah Mayralborn.
