Shillong, Nailur 07
Ka Voice of the People Party (VPP) Youth Wing, hapoh ka jingïalam u Bah Marbud Dkhar, President, ha ka 7 tarik Nailur, 2026, ka la leit ban kynduh ïa u Inspector General (IG) ka Prison, ban pan jingshai halor ka jingbym ïoh jingtip ki samla ïa ki 53 tylli ki kam ba lait, kiba la dep thep bad mih naduh u snem 2019.
Ka jingleit kynduh ka VPP, kadei hadien ba ki la ïoh ka jingujor na ki samla thep kam thep jam, ba kim shym la ïoh jingtip kat haduh une u snem ba mynta, ba kane ka kam ka la ïaid shano.
Hynrei namar ka jingbymdon u IG, ki nongïalam ka Youth Wing, ki la ïoh ban ïakren noh bad u AIG.
Haba kren sha ki lad pathai khubor, na ka liang u Bah Marbud Dkhar, u la ong ba kine ki kam kiba lait kidei naduh u snem 2019, hynrei haduh mynta ym pat ïoh jingtip ba ïa kitei ki kam la pyndap ne-em.
U la ong ba na ka liang u AIG u la pyntip bad kam ba ka don jingthut hangne hangtai bad kumta kin sdang biang ban leh ïa kaba donkam.
Nalor kata, u la pynpaw ruh ka jinglyngngoh, ba la kumba 7 snem ei-ei ki samla kim ïoh ka jingshai bad kaba u la suba jur, ba lehse ka la don ka jingthep kam tuh ha kitei ki kam ba lait.
“Haduh mynta u snem, ka tnad kam shym la pat khot eiei halor kane ka kam ba lait, ka pynsuba jur ba lehse ki la dep ban thung tuh da kiwei ki briew ha kine ki kam ba lait,” la bynrap u Bah Marbud.
Kumta u la bynrap da kaba ong ba ka VPP SYW, kan dangïaid buddien halor kane ka kam, na ka bynta ka jingud jingnam kiba bun ki samla pule.
