Shillong, Nailur 28
Ka ‘Estimates Committee’ jong ka Ïingdorbar Thawaiñ ka la bthah ïa ka tnad Labour ba ka jingthung kam ïa ki samla pule kiba la pyndep na ki Industrial Training Institute (ITI) kiba don ha ka Jylla ka dei ban long ka mat kaba hakhmat eh.
Kane ka komiti kaba la khlieh da u MLA ka Nongpoh, u Bah Mayralborn Syiem ha ka Lah Sngi U Blei ka la khmih bniah ïa ka jinglong-jingman jong ki ITI kiba don ha Shillong, Tura, Jowai, Williamnagar, Nongpoh, Ampati, Khliehriat, Mawkyrwat bad kiwei-kiwei ki jaka.
“Ngi la pynlong ïa ka jingïalang khmih bniah bad ka tnad Labour ha kaba ïadei bad ki ITI bapher-bapher ha ki bynta bapher-bapher jong ka Jylla. Ngi la bthah ïa ka tnad ba hadien ba ki samla pule ki la pynïasoh sha ki ITI bad ki la pyndep ïa ka jingpule (Graduate), ka mat ba kongsan eh ka dei ka jingthung kam,” la ong u Bah Mayralborn.
“Ngi la bthah ïa ka tnad Labour ban wad ïa ka lad ban ïasoi ïa ki MoU bad ki ‘agency’ bapher-bapher na ka bynta ka jingthung kam. Kane ka long kaba kongsan bha na ka bynta ka jingpynrung kam ïa ki samla shynrang bad kynthei jong ngi kiba pyndep na ki ITI,” u la ong.
U Chairman u la ong ba ka ‘Panel’ ka la bthah ïa ka tnad ban pyntikna ba ïa ka mat halor jingthung kam, la buh hakhmat eh na ka bynta ki samla pule ITI ‘Graduate’ ha kylleng ka Jylla.
La hato ki ITI kin lah ne em ban weng ïa ka jingeh jong ka jingkyrduh kam, u Bah Mayralborn u la ong ba ka donkam ïa ka jingïatreilang jong baroh ki tnad treikam.
“Ha kano-kano ka Jylla, ym don kawei ruh ka ‘agency’ ne karkhana kaba lah ban pynurlong lut ïa baroh. Ka ITI ka long shi bynta jong kane. Ka jingwanrah ïa ka jingkyrshan pisa na shabar ban seng ïa ki karkhana, bad ki kompeni ba pynïaid da ki ‘riew shimet kan ïarap ruh ban pynmih ïa ki kam ki jam,” u la ong.
U la bynrap, “Ka jingkyrshan kaba la ai da ka Sorkar Jylla sha ki nongseng kam seng jam lyngba ki prokram kum ka ‘CM-Elevate’, ‘PRIME’ bad kiwei-kiwei baroh ki dei ki sienjam ban pynmih ïa ki kam ki jam. Ka dei ka jinglum lang jong ki jingpyrshang jong baroh ki tnad treikam bad ha kaba kut kan ïarap weng ïa ka jingeh haba ïadei bad ka jingkyrduh kam-kyrduh jam. Kata ka dei ka jingpyrshang jong ka Sorkar.”
