Shillong, Nailur 28
U MLA ka BJP na Nongpoh, u Bah Mayralborn Syiem ha ka Lah Sngi U Blei u la ong ba ka jingkylla suiñbneng bad ki kam tei jingtei ba khlem ki kyndon ba beit ba ryntih ki ïalam sha ka jinglang bad jingshlei um ba khah-khah ha Ri-Bhoi distrik bad kiwei-kiwei ki bynta jong ka Jylla.
Haba kren sha ki nongthoh khubor mynta ka sngi, u Bah Mayralborn u la ong ba ka jinglong-jingman ka suiñbneng ha kine ki ar-lai snem ba la dep ka la kylla bad ka jingkylla suiñbneng ka dei ka daw bah, hynrei ki kam ba la leh da u briew ki la nang pynsniew shuh-shuh ïa ka jinglong-jingman.
“Ka don ka jingpom lum bad ka jingbret khyndew ka bym shym la pynbeit lypa. Hashuwa, ngi don ki nala um kiba don ïa ka jingheh kaba 15 phut – da ka jingkiew ha ka jingbun briew, ki briew ki shna ïing, ki jaka khaïi-pateng ‘Complex’ bad ki surok. Ka nala um kaba 15 phut, mynta la pynduna sha ka 7 phut. Kumta, shano ka um kan leit? Kan pyrshang ban wad lynti bad haba khatduh, kan leit poi sha kamra shet-ja jongno-re-jongno naba ym don lynti shuh,” u la ong.
Utei u nongthaw aiñ ka BJP u la ïathuh ba u la pynlong ruh ïa ka jingïalang bad ka tnad Water Resources, PWD bad ka tnad pynroi sor ban ïakren halor katei ka jingeh ha ki jaka kum ha Byrnihat, Nongpoh bad Jorabat.
“Kine ki dei ki shnong kiba rit ha kaba ngi hap ban pynleit jingmut ha ki nala um bad ki jingpyntuid um, wat ha shilynter ka surokbah ‘National Highway’. Ka ‘Cross-drain’ kaba la shna ha u snem 2010 ka lah ban shah khang hadien 15 snem. Ka um slap ruh ka la nang kham bun mynta haba ïanujor bad kito ki snem, ryngkat ki jaboh-jabaiñ bad ki jakhlia ba la bret da ki nongshong shnong bad ki dukan, kaba la ïalam pat sha ka jinglang jong ka um,” u la ong.
U Bah Mayralborn u la ong ba ka jingshlei um kam dei shuh tang ha Assam ne ha Meghalaya.
“Ka jingshlei um kam jia tang ha Jorabat, Shillong ne Nongpoh, hynrei wat ha Guwahati, Delhi, Bangalore ruh. Ka dei ka mat kaba ju jia ha kine ki sngi bad ka long ka jingeh ïa baroh,” u la ong.
Halor ki sienjam ban pynbeit ïa kane ka jingeh, u la ong, “Ngi hap ban ïasnohktilang. Ka polisi ka dei ban don, hap ban wan ïalam ïa ki ‘riew shemphang bad ki tnad bapher-bapher ki hap ban wan shakhmat ban shimkhia ïa kane ka mat.”
U la pyntip ruh ba ha ka 2 tarik Risaw, yn pynlong ïa ka prokram pynitynnad ha kawei ka Complex kaba don ha ka distrik.
“Ngin sa pynlong ïa ka prokram bad ki bor distrik ha kaba ngan plie ïa katto-katne ki kam pynitynnad. Ngi dang pyrshang suki-suki ban wanrah ïa ki jingkylla khnang ba kin ïahap bad ki briew ha kaba ki nongjngohkai pyrthei bad ki nongleit-nongwan ki lah ban wan, thied jingthied bad pynlut por. Ngi dang wad ki lad ki lynti ban pynitynnad ïa kane,” u la bynrap.
