Nongpoh, Nailur 28
Ki nongïalam jong ka Hills Farmer Union (HFU) ha ka sngi Nyngkong kila pynlong da ka jingïalang ha Nongpoh ban pynshai sha ki nongkhaïi bad nongshalan mrad halor ka kaiphod kaba la ïoh na ki bor pulit ka Ri Bhoi ha kaba ïadei bad ka jingkynnoh lum pisa beaiñ lane kata ka ‘direct entry’ ha thanad Byrnihat.
Ha kane ka jingïalang kaba la pynlong ha Dorbar Hall Sajer nalor ka HFU la wan ban ïadon ryngkat da ki nongshalan mrad (livestock transporters) kiba dei na Ri Bhoi.
Kumban shu kdew hangne, ka HFU na ka por sha ka por ka ju shimkhia halor ki jingkynnoh kiba la mih ba ka don ka jinglum pisa beaiñ ha Byrnihat pyrshah ïa ki kali kit mrad kiba wan rung sha ka Jylla Meghalaya ha kaba ka seng kala shimkhia ïa kane ka kam bad u Deputy Commissioner ka Ri Bhoi District, ka tnad Veterinary bad ka Sorkar Jylla ruh kumjuh.
Haba pynshai ha kane ka sngi katkum ka kaiphod ba la ïoh na ka tnad pulit, u Bah Alfonbirth Kharsyntiew, General Secretary ka HFU u la ïathuh ba kam don satia kata ka kaiphod jinglum pisa lane ka ‘direct entry’ kumba kynnoh ha thanad Byrnihat pyrshah ïa ki kali kit mrad bad ba na ka liang ki pulit ki pyndep ïa la ka kamram na ka bynta ban peitngor ïa ki kali kiba pynkheiñ aiñ bad don bynta ha ki kam sniew.
U Bah Alfonbirth u la ong ruh ba kum ki nongkhaïi ki dei ban tip ba kam dei satia ban don kano-kano ka jinglum pisa beaiñ khlem da ai bor da ka Sorkar bad ka tnad Veterinary.
Ha kajuh ka por, ka seng kala dawa ruh ïa ka Sorkar ba kan buh noh ïa ki khyrdop talasi ïa ki mrad kiba wanrah na shabar ka Jylla bad ka quarantine center na ka bynta kito ki mrad kiba don jingpang ban ïada ïa ki mrad kiba ri ha ka Jylla khamtam na ka jingsaphriang ka khlam African Swine Fever kaba ktah shikatdei ïa ki nongri sniang ha ka Jylla.
