Shillong, Risaw 04
U Bah AL Hek uba dei u Nongïalam ka BJP bad MLA ka Pynthorumkhrah ha ka sngi Saitjaiñ u la pynpaw ba ki 8 ngut ki MLA barim ka UDP ba ïasoh sha ka BJP kin nym mad ïa kajuh ka nusib kum ki MLA ka Congress kiba leit ïasoh sha ka TMC, haba pynpaw ba ka BJP hala suhthied hapoh ka Jylla.
Haba kynthoh ïa ki jingkren u President ka Meghalaya Pradesh Congress Committee (MPCC) Bah Vincent H Pala, u Bah Hek u la ong, “Phim lah ban pyndonkam da ujuh u jingthew ïa man ki jingkylla ka saiñpyrthei. Ka BJP ka don la ka jong ka nongrim kaba khlain bha. Phi la ïohi dang shen ba kumno ki MLA bad MDC ba mynta kila ïasoh sha ka BJP”.
“Ka dei ka kam jong ki lada ki MLA ka Congress ki leit ïasoh TMC. Ngim don bynta eiei halor kane. Kito kiba la ïasoh sha ka BJP ki long kiba skhem. Kan ym jia kumta. Ngi la pynkhlain ïa ka party ba kan ïalam ïa ka Sorkar ha u 2028,” u la ong.
Halor ki khubor ba ka BJP kala dawa shuki Myntri bad ka shuki Lamphang hadien ba ka jingdon MLA kala kiew sha ka 10 ngut, u Bah Hek u la ong ba um don bynta eiei ïa kane.
“Nga kren shai, ngan ym shim ïa kano kano ka shuki Myntri. La kan don ne kam don kano kano ka jingbujli, kane ka shong beit ha u Myntri Rangbah ka Jylla. Kane ka dei ka Sorkar MDA,” u la ong.
“Don kiba ong ba ngan long Symbud Myntri Rangbah, hynrei nga ong em. Ngi dei ban ailad ïa ki riew thymmai kiba dang shu wan, ai ba kin long Myntri ma ki. Ngan pynleit jingmut sha ka ilekshon 2028,” bynrap u Bah Hek.
Halor ka kam tih dewïong, u Bah Hek u la ong ba ka BJP kala buddien ïa kane ka kam ha ka kyrdan kaba hakhlieh duh.
“Kane kam dei shuh ka kam ba dang don ha ïingbishar. Ngi la buddien ïa ka bad ngin ieh ha ka jingstad jong ki nongïalam na Delhi-u Myntri Rangbahduh Narendra Modi bad Amit Shah. Ngi la kyrpad ban weng noh ïa ka jingkhang tih dewïong ha Meghalaya,” u la ong.
Halor ka jingïakajia khappud bad ka Assam, u Bah Hek u la ong, “Ngi hap ban leit sha ki shnong ki thaw ban pynbeit ïa kane. Ngi donkam ïa ka jingsuk bad ka jingïa im ryngkat. Shim ïa ki jingai jingmut jong ki briew kiba sah ha ki jaka ba ïakajia, la ki kwah ban neh bad ka Assam lane Meghalaya. Ngi dei ban ieh ha ka rai u ba bun,” u la ong.
