Jowai, Risaw 04
Ka Jingïaseng Samla Balang Presbyterian Jowai ha ryngkat ka jingïatreilang bad ka Jowai Civil Hospital Blood Centre ha ka 3 tarik Risaw kala pynlong ïa ka prokram ai jingpynshai ha Iawthymme Police Point Ladthadlaboh, Jowai.
Ka Dr. I Khyriem, in-charge jong ka Jowai Civil Hospital Blood Bank Centre ha ka jingkren kala ai khublei kyrpang ïa ka Jingïaseng Samla Balang Presbyterian Jowai kaba la pynlong ïa kane ka prokram na ka bynta ka jingkyrshan bad jingïarap kaba ki la ïai bteng ïa ka Blood Centre, khamtam eh ha kaba kyntiew bad pynshlur ïa ka jingai snam mon sngewbha.
Ka la kren shaphang ka jingdonkam bad jingmyntoi jong ka jingai snam, da kaba pynpaw kumno ka jingai snam mon sngewbha man ka por ka ïarap bad pynbiang na ka bynta ki nongpang ha ka por ba donkam kyrkieh.
Ka la ong ba ka jingai snam ka dei ka kam kaba suk hynrei kaba don jingmut ban shakri ïa ka imlang sahlang. Ka la kyntu ïa ki paidbah ba kim dei ban ap haduh ba u dkhot jong ka ïing ka sem ne ka jingjia ba kyrkieh kin donkam snam, hynrei ban ai snam da ka mon sngewbha bad man ka por katba ki sngewbit.
Ka la khot ruh ïa ki paidbah ban pynphriang ïa ka jingtip bad pynshlur ïa kiba ha ïing ha sem, ki paralok bad kiwei kiwei ban ïadon bynta lang ha ka kam ai snam mon sngewbha, ban ïarap ban pynthikna ba ka snam kan don na ka bynta kito kiba donkam.
Ha kane ka prokram pynsngewthuh la kynthup ruh ïa ka street play, kaba thmu ban pynsngewthuh bad pynshlur ïa ki paidbah ban ïashim bynta ha ka jingai snam.
Ïa ka jingïalang la pynïaid da u Bah H. M. Bareh uba long u Chairman ka Jingiaseng Samla Balang Presbyterian Jowai ha ka jingdonlang u Rev. S. Siangshai, Church of the Resurrection CNI Ladthadlaboh Jowai, u Bah Aiban Shullai Waheh Shnong Ladthadlaboh nalor kiwei kiwei.
