Shillong, Risaw 04
U MLA ka BJP na South Shillong Constituency uba dei ruh u Myntri ha ka Sorkar MDA bad ruh u nongïalam ki 10 ngut ki MLA ka BJP u la ong ba ki phra ngut ki MLA ka UDP kiba dang shu rung sha ka BJP ki lah ban leit ïakynduh biang ïa u Amit Shah sha Delhi na bynta ban dawa Myntri ha Sorkar MDA.
Haba ïakren bad u Bah Sanbor Shullai hadien ba la wai ka jingïalang pdiang ïa u MDC South Jowai constituency Bah Moonlight Pariat ha ophis BJP mynha ka 3 tarik mynta u bnai u la ïathuh ba ki phra ngut ki MLA kiba dang shu rung sha ka BJP ki lah ban leit biang sha Delhi hadien ba u Amit Shah uba dei u Myntri ka Sorkar Pdeng u la pynsangeh noh ban wan sha Shillong.
Haba kylli na kaei ka daw ba u Amit Shah u pynsangeh noh ban wan sha Shillong, u Bah Sanbor um shym la tip ïa ka daw.
Haba kylli biang ka dei shisha ba ki phra ngut ki MLA kiba dang rung sha ka BJP ki dawa sa ar ngut ki Myntri ha ka Sorkar MDA-2, u Bah Sanbor u la ong ba ïa kata um don jingtip eiei namar kine ki ïakren beit bad ki nongïalam ha Delhi.
Shuh shuh u nonglum khubor u la kylli bniah biang haba u Amit Shah u la pynsangeh ban wan sha Shillong hato kane ka jingdawa pynrung Myntri kan dang urlong, u Bah Sanbor u la ong ba kine ki MLA ki lah ban leit biang sha Delhi ban ïakynduh ïa ki nongïalam ha Delhi lada ki kwah ban pynurlong ïa ka jingdawa jong ki.
“Na ka liang jong ngi ki nongïalam BJP ha Meghalaya ngim don jingtip eiei namar naduh ba sdang ki la ïakren bad ki nongïalam ha Delhi,” u la ong biang.
Kumban shu pynkynmaw ba ka la don ka khubor ba hadien ba ki phra ngut ki MLA ka UDP ki la rung sha ka BJP, ka la don ruh ka khubor ban pynrung Myntri ha ka Sorkar MDA ha ka jingïalam u Conrad K Sangma ar ngut kata ïa u Bah Kyrmen Shylla na Khliehriat bad Bah Mayralborn Syiem na Nongpoh bad ruh ban kyntiew kyrdan ïa u Bah Lahkmen Rymbui uba la dei lypa u Myntri ha ka Sorkar MDA-2 ban long kum u Symbud Myntri Rangbah ka jylla.
Ki khubor ki ïathuh ba lada u Conrad K Sangma u pdiang ïa ka jingdawa jong ka BJP ha Delhi kaba mut uwei na ki Symbud Myntri Rangbah kiba don mynta yn hap ban pynhiar shuki beit la ka dei ïa u Bah Prestone Tynsong ne ïa u Bah Sniawbhalang Dhar.
