Shillong, Risaw 04
U Bah Ardent Miller Basawiamoit, President ka Voice of the People Party (VPP) u la pynpaw ka jingsngewsih hadien ba la ïohi ba i wei i khyllung i la khlad noh ha shiteng lynti, namar ka jingbym biang ka surok ban ïaid kali, ban poi sha ka jaka sumar.
Kane ka jingjia khlad i tei khyllung, kadei myn ha ka 01 tarik u Risaw 2026, ha ka rta ba 3 snem tam eiei, iba dei na ka shnong Domkyrkoh, kaba hap hapoh ka Rambrai Konstitwensi.
“Ka Sorkar mynta kadei kaba kop haba ïadei bad ka roi ka par, hynrei mynta ngi ïohi shai ba kam long kaba bit kaba biang ha ka jingïalam khmat ka Sorkar NPP,” la ong u Bah Ardent, haba kren sha ki lad pathai khubor.
U la ong ba kane kamdei ka sien ba nyngkong, kaba ki paidbah ki mad bad ki kynduh ïa ki jingeh kiba kum kine, hynrei u la ong ba ka Sorkar, kadei ban khmih sha kine ki jingeh kiba mih na ka por sha ka por.
“Ymdei ban shu pynksan jubor ne ban ïaida jubor, namar haba kut phin nym lah ban buhrieh. Ngi ïohi ïa ka roi ka par, kynthup ki surok bad ki lynti ki syngkien, hynrei kine kidei ka hok jong u paidbah, bad teng teng ngi ïohi ba ka rukom mang ka Sorkar na ka bynta ki lynti ki syngkien, ka pher bad ka jingdonkam u paidbah. Kaei kaba ngi kwah ka long, ba ka Sorkar kadei ban khmih sha kita ki jaka kiba u paidbah u donkam kyrkieh ïa ki surok,” la ong u Bah Ardent.
Haba ïadei bad ka jingkhlad noh i khyllung ha shiteng lynti, u Bah Ardent u la bynrap biang “Ka Sorkar kadei ban peit sha kino ki jaka kiba hap ban pynpoi surok shuwa bad ïa kino ki jaka kiba hap pynpoi kham hadien”.
