Shillong, Risaw 04
U MDC ka BJP na Tura, u Bernard N. Marak u la kyntu ïa u Symbud Myntri Rangbah ka Jylla, Bah Prestone Tynsong ban bthah ïa ka GHADC ba kan pynlong noh mardor ïa ka People’s Plan Campaign (PPC) ha Ri-lum Garo bad ban khot ïa ka jingïalang khmih bniah kaba sahteng jong ka ‘Tripartite Agreement’ ha Tura.
Ha ka kyrwoh ba la aiti ha ka Sngi U Blei, u Marak u la ong ba baroh ar tylli ki mat ki long kiba sngewkhia shi kat dei namar ka jingbym bud ryntih ïa ka aiñ na ka liang jong ka Garo Hills Autonomous District Council bad ki bor ba dei khmih.
Halor ka PPC, u Marak u la ong ba ïa ka ‘Campaign’ ba la bthah da ka Sorkar Pdeng la buh ban pynlong ha ka 2 tarik u Risaw, 2026 lyngba ki ‘Gram Sabha’ ban pyntikna ïa ka jingïashim bynta jong ki paidbah, ban lum thup ïa ki jingai jingmut jong ki bad ban pynrung ïa ki jingtyrwa na ka bynta ki kam pynroi.
U la kdew ba ïa kane ka sienjam donkam ban buh ne ‘upload’ ïa ki jingtip ba bniah ha ka ‘PPC Portal’, ban pynkhreh ïa ki ‘agenda’ hapoh ka ‘Panchayat Niyam’, ban khot ban wer ïa ki nongshong shnong, ki ophisar jong ka tnad treikam ba dei khmih, ki nongshah khot ba kyrpang, ki nongïalam bad kiwei, bad ban pyntikna ïa ka jingpynbna paidbah, ki jingpynbeit ïa ka jaka bad ki kam ba ïadei bad ka IEC.
“Hynrei ka long kaba sngewsih ba ym shym la khot pynlong ïa ka ‘Gram Sabha’ ha GHADC bad ka Block ha ka 2 tarik u Risaw, 2026, ym shym la pynphriang ïa ki jingtip sha ki dkhot ba la jied, bad ym shym la buh lane ‘upload’ ïa ki jingïalang bishar ha ka ‘Portal’,” ong u Marak.
“Kane ka long kum ka jingkyntait kaba la thmu ïa ka jingïashim bynta jong ki paidbah bad ka jingpynkheiñ ïa ki jingbthah jong ka Sorkar Pdeng,” u la bynrap, da kaba kyrpad ïa ka jingtuklar ba kyrkieh jong u Bah Tynsong ban bthah ïa ka GHADC bad ki bor pynïaid jong ka Block ban pynlong ïa ka PPC ha ka rukom kaba khuid ba shai, da kaba pyntip lypa shuwa sha ki paidbah bad ki nongshim bynta.
Halor ka jingïateh lai-liang ne ka ‘Tripartite Agreement’, u Marak u la pynkynmaw ba kum u nongsoi, u shah pynbor ban kdew ba ki jingïalang ki long kiba la bthah ban pynlong man la ka ar bnai ban khmih bniah ïa ka jingpyntreikam.
“Ka jingïalang kaba khatduh ka la long ha ka 26 tarik u Nailur, 2025, bad ym shym la khot jingïalang hadien kata la palat shisnem. Kane ka long ka jingpynkheiñ ïa ki jingkular jong ka GHADC bad kiwei-kiwei ki bor ba dei khmih,” u la ong.
Na ka liang u Marak u la kyntu ruh ïa u Symbud Myntri Rangbah ban bthah ïa ka GHADC bad ki bor pynïaid jong ka Block ba kin pynlong mardor ïa ka PPC ryngkat ka jingïashim bynta ba pura jong ki paidbah bad ban khot noh ruh ïa ka jingïalang ‘Tripartite’ kaba la sahteng ha Tura khlem da pynslem shuh ban pyntikna ïa ka jingbud ryntih bad ban wanrah biang ïa ka jingshaniah hapdeng ki nongïashim bynta.
U la maham ba ka jingbym shimkhia mardor “kan pynbor ïa ngi ban ïaid katkum ki lynti jong ka aiñ na ka bynta ka jingpynkheiñ ïa ki jingkular bad ki jingïateh ba la buh da ka aiñ.”
Ïa ki kopi jong kane ka kyrwoh la phah sha u Myntri tnad kam pohïing ka Sorkar Pdeng, u Amit Shah, Joint Secretary (NE), ka tnad kam pohïing, ka tnad Panchayati Raj, ka tnad District Council Affairs, ka Sorkar Meghalaya bad kiwei-kiwei kiba ïadei kam.
