Shillong, Risaw 04
U Deputy Chief Executive Member ka Jaiñtia Hills Autonomous District Council (JHADC) Bah Lasky Rymbai uba dei u MDC ka UDP na Tuber constituency u la ong ba haduh mynta baroh lai ngut ki MDC ka UDP ki dang don beit ha ka UDP.
Haba ïakren bad u nongthoh khubor lyngba ka phone u Bah Lasky Rymbai u la ong ba watla ki ar ngut ki MLA ka UDP kata u Bah Kyrmen Shylla na Khliehriat constituency East Jaiñtia Hills District bad u Bah Lahkmen Rymbui na Amlarem constituency West Jaiñtia Hills District ki la rung sha ka BJP hynrei ma ki pat ki dang neh bad don ha ka UDP.
U la ïathuh ba ki MDC ka UDP ha JHADC ki don lai ngut kata ar ngut kiba hap ha Khliehriat constituency ma u (Lasky) na Tuber bad u Bah Wailad Dameshwa Siangshai na Musiang Ryngad, katba uwei u MDC uba hap ha Amlarem constituency Bah Medeling Swer na War East.
Shuh shuh u la pyntip ba ha ka Executive Committee ki MDC ka UDP ki ïoh ar ngut kata ma u kum u Deputy CEM bad u Bah Medeling Swer kum u Executive Member bad u Bah Wailad Dameshwa Siangshai kum u Deputy Chairman.
“Ngin sa peit ïa ki kam ba ka BJP kan leh hadien ba ki phra ngut ki MLA ka UDP ki la rung namar ngim lah ban shim rai kyrkieh,” u la ong.
U la ïathuh ba ha kine ki bnai ba la dep haba ka UDP ka la pynthymmai ïa ki nongkitkam ki la jied ïa u kum u President ka UDP East Jaiñtia Hills District.
Kumban shu pynkynmaw u Bah Lasky Rymbai bad kiwei de ki nongkitkam ka UDP ha East Jaiñtia ki khlem leit sha ka jingïalang ba la khot da u Bah Kyrmen Shylla haba u pynshai ban rung sha ka BJP.
Ki khubor ki ïathuh ba ka jingbym pat shim rai ki lai ngut ki MDC ka UDP ban rung sha ka BJP namar haduh mynta ka jingïadei ka UDP bad ka NPP ha Sorkar Jylla ka dang skhem bad ka jingïadei ka UDP ha JHADC ruh ka dang skhem.
Haduh mynta ka BJP ha JHADC ka dang don tang uwei u MDC hadien ba la pynïasoh u Bah Moonlight Pariat uba dei u MDC shimet uba jop na Jowai South constituency.
