Shillong, Risaw 18
Ha ka jingpynkhreh na bynta ka ilekshon MP shiteng samoi sha Lok Sabha na Shillong Parliamentary Konstitwensi, ka Voice of the People Party (VPP) ha ka 17 tarik Risaw, 2026, ka la pynlong ïa ka jingïalang ha Sutnga, kaba hap ha East Jaiñtia Hills District.
Ha kane ka jingïalang, la wan ban ïashim bynta da u Bah Ardent Miller Basaiawmoit, President ka VPP, ha ryngkat ka jingïadonlang, u Bah Damewanhi L. Rymbai, President VPP East Jaiñtia Hills District, u Dr. Kara Chen, Vice President, ka Secretary ka VPP State Women’s Wing, ka Dr. Bahunlang Lyngdoh Tron, ka President ka State Women’s Wing, Kong Phileta Syiem, bad kiwei-kiwei pat.
Haba ai jingkren ha ka jingïalang, u Bah Ardent u la ong ba ka jingthaw ïa ka VPP ka long, ban wanrah ka jingïatylli hapdeng ka jaitbynriew bad bad ai mynsiem ïa ki ban long kiba stad bad ban ym shah pyndonkam bakla ha kiwei pat.
U la kdew ruh ba ka party kan ym kynmaw ïa ki nongkyrshan jong ka tang ha ka por ilekshon, hynrei kan pynthikna ba ki briew kiba shah jied ban long ki nongmihkhmat, kin trei bha ïa ka kamram.
U la ong ruh ba ka party, kan ym map ïa kino-kino ki nongïalam kiba leh tam da kaba kdew halor ka jingsospon jong ka, ïa u wei u MLA, kum kawei na ki nuksa.
“Ka VPP ka la don haduh 4 ngut ki MLA, hynrei u wei pat ka la sospon noh bad kata kadei ka bor jong ka party, namar ngim kwah ba ka party kan leh pyrshah ïa kita ki nongrim, kiba ka party ka la kular hakhmat u paidbah,” la ong u Bah Ardent.
“Ngin nym map ruh ïa ki MDC lada ki leh kumta, ngin nym map MP. Kata kadei ka jingïaid lynti bad ka jingpynwan dur jong ka party,” u la bynrap.
Na ka liang u Bah Damewanhi, u la ong ba katei ka thaiñ kadei kaba riewspha bha ha ki marpoh khyndew hynrei bun napdeng ki nongshong shnong, kin hap ban mad jingeh bad u la kynnoh ruh ba ki marpoh khyndew katei ka thaiñ ki la shah die lut sha ki briew kiba nabar jylla ha ki nongmihkhmat, nalor ki nongïalam shnong.
